ჩემს თავს ვერ ვხედავ იმ გუნდში, სადაც იქნება ვანო მერაბიშვილი – ამის შესახებ გადაცემა „რეაქციაში” „ნაცმოძრაობის“ პოლიტსაბჭოს თავმჯდომარემ, ნიკა მელიამ განაცხადა.
მისი თქმით, ვანო მერაბიშვილმა ბევრი რამ გააკეთა, თუმცა იყო არაკონსტიტუციური ქმედებები.
„ძალიან რბილად, რომ ვთქვა, მას გირგვლიანია მკვლელობის შემდეგ არანაირი მორალური უფლება არ ჰქონდა თანამდებობაზე დარჩენის”, – აღნიშნა მელიამ.
ცნობისთვის, წინასაარჩევნო კამპანიის დაწყებამდე ნიკა მელიას ვანო მერაბიშვილის მიმართ განსხვავებული პოზიცია ჰქონდა და ამბობდა, რომ ყოფილი შს მინისტრი „ნაციონალური მოძრაობის” გუნდში რჩება. მიმდინარე წლის მაისში იმედს გამოთქვამდა, რომ „ადამიანი, რომელსაც აქვს დიდი გამოცდილება, როგორც ნეგატიური, ასევე პოზიტიური, პოლიტიკურ პროცესებში ჩაერთვება“.
„არავის აქვს უფლება ამ ქვეყანაში კი არა, საერთოდ დუნიაზე, რომ ნებისმიერ ადამიანს უარი უთხრას პოლიტიკურ პროცესებში ჩართვაზე და მით უფრო, ვანო მერაბიშვილს, რომელმაც შვიდი წელიწადი გაატარა სამარტოო საკანში. ვიმედოვნებ, რომ იგი ამ უფლების რეალიზებას მოახდენს და ჩაერთვება პოლიტიკურ პროცესებში აქტიურად, ვინაიდან ამ ყველაფრის უფლებას იძლევა მისი უდიდებულესობა ხალხი. როგორი ფორმით გადაწყვეტს იგი კარს მომდგარ არჩევნებზე მონაწილეობას, პირველ რიგში მისი გადაწყვეტილება იქნება და მან უნდა განაცხადოს.
ვიმედოვნებ, რომ ადამიანი, რომელსაც აქვს დიდი გამოცდილება, როგორც ნეგატიური, ასევე პოზიტიური, ჩაერთვება პოლიტიკურ პროცესებში. დანარჩენს თავად განაცხადებს. აქვე შემიძლია გითხრათ, რომ ვანო მერაბიშვილი იყო „ნაციონალური მოძრაობის“ წევრი, როდესაც იგი შევიდა ბიძინა ივანიშვილის საპატიმროში. მაშინ გახლდათ გენერალური მდივნის სტატუსის მატარებელი. დღეს ვანო მერაბიშვილი რჩება „ნაცმოძრაობის“ წევრად. იგი არ გახლავთ ფორმალურად გენერალური მდივანი. უფრო მიკვირს, როდესაც კითხვა იბადება, უნდა ჩაერთოს თუ არა პოლიტიკურ პროცესებში“,- განაცხადა ნიკა მელიამ მაისში.
