„მოქალაქეების“ ერთ-ერთმა ლიდერმა ლევან იოსელიანმა ისაუბრა მემორანდუმზე, რომელიც „ქართულ ოცნებასა“ და „მოქალაქეებს“ შორის გაფორმდა. მის თქმით, თუ ვინმეს აქვს ამ დოკუმენტთან დაკავშირებით უკეთესი წინადადება, შეუძლია შეუერთდეს.
„ეს არის შეთანხმება, რომელიც გაკეთდა მათთან ერთად და გულისხმობს იმას, რომ ოპოზიციური პარტია თუ შემოვა პარლამენტში, მას ეყოლება წარმომადგენელი ცესკო-ში, რაც სრულიად ლოგიკურია. ამ საკითხში ძალიან თანმიმდევრული ვარ. იცით, რომ წინააღმდეგი ვიყავი დაფინანსება აეღოთ ოპოზიციურ პარტიებს, თუ პარლამენტში არ შემოვიდოდნენ, აეღოთ ხელფასები. ეს არის მემორანდუმი, რომელიც მთლიანადა ასახავს ფასილიტატორებთან ოპოზიციის მუშაობის შედეგს. თუ ვინმეს აქვს უკეთესი წინადადება, უკეთეს განზრახვა, ეს არის ღია დოკუმენტი, შეუძლიათ მოვიდნენ, შემოურთდნენ, ხელი მოაწერონ და მის გაუმჯობესებაზე იმუშაონ. მე მხოლოდ მივესალმები. ეს არ არის რაღაც კანონი, რომელიც ვერ შეიცვლება. ჩვენი კრიტიკის ნაცვლად დასხდნენ მოლაპარაკების მაგიდასთან და ეს დოკუმენტი გახადონ კიდევ უფრო უკეთესი, თუ ეს უნდათ. იმიტომ, რომ ჩვენ გავაკეთეთ ის, რაც ვერ გააკეთა ვერავინ, ჩვენ გავბედეთ, დოკუმენტს ხელი მოვაწერეთ, პარლამენტში მოვიტანეთ და დღეს ვიწყებთ ამ დოკუმენტზე მუშაობას“, – განაცხადა იოსელიანმა.
