„დარწმუნებული ვარ, პრემიერ-მინისტრს და მთლიანად, მთავრობას ნაკლებად აქვს გათავისუბული ის, რომ საქართველოს პარლამენტი არის მაკონტროლებელი ორგანო, მათ შინაგანი რწმენა გააჩნიათ, რომ მათი მაკონტროლებელი არის ბიძინა ივანიშვილი და მხოლოდ მისი ნება-სურვილის, განკარგულების შესაბამისად უნდა იმოქმედოს საქართველოს მთავრობამ”,- ამის შესახებ „ნაციონალური მოძრაობის” დეპუტატმა, გიორგი ბოტკოველმა პარლამენტში პრემიერის წლიურ მოხსენებასთან დაკავშირებით განაცხადა.

“რაც შეეხება ჩვენს პოზიციას, ჩვენი მხრიდან იქნება ძალიან ბევრი კონკრეტული კითხვა დასმული პრემიერის მიმართ, მთავარი არის ერთი – რატომ ხდება, რომ ბოლო 9 წელია „ქართული ოცნების“ ხელისუფლება არაფერს აკეთებს იმისთვის, რომ საქართველოში მცხოვრები ადამიანების ყოფა გაუმჯობესდეს. ჩვენ ვხედავთ მხოლოდ და მხოლოდ ერთ რამეს, გამდიდრებულ ჩინოვნიკებს, გამდიდრებულ „კლანის“ წარმომადგენლებს, „კლანურ“ სასამართლოს და ყველაფერს იმისთვის, რომ მორგებული იყოს ყველა სახელმწიფო სისტემა მხოლოდ ერთ ადამიანზე, ბიძინა ივანიშვილზე. ამიტომ, ჩვენ მხრიდან იქნება ძალიან კონკრეტული და მწარე კითხვები, რომელზეც პრემიერ-მინისტრს პასუხის გაცემა მოუწევს“, – განაცხადა ბოტკოველმა.

ცნობისთვის, პრემიერ-მინისტრი ირაკლი ღარიბაშვილი დღეს, პარლამენტის წინაშე სამთავრობო პროგრამის შესრულების ანგარიშით წარდგება.