ოპოზიციასა და ხელისუფლებას შორის მოლაპარაკების მეოთხე რაუნდი დასრულდა. როგორც შეხვედრის შემდეგ „სტრატეგია აღმაშენებლის“ ლიდერმა, გიორგი ვაშაძემ განაცხადა, პარტია მიმდინარე პროცესში ბოლომდე მიიღებს მონაწილეობას.
„ყველაფერს აკეთებენ მოდერატორები, რომ პოზიციების დაახლოება მოხდეს. მთავარია, რომ პროცესი მიდის. არ ვიცი სადამდე მიგვიყვანს ეს პროცესი, პირდაპირ გეუბნებით. თუმცა ჩვენ, „სტრატეგია აღმაშენებლის“ გუნდი მზად ვართ, რომ ბოლომდე მივიღოთ პროცესში მონაწილეობა.
ჩვენ გადაწყვეტილებას ყოველთვის მივიღებთ იქიდან გამომდინარე, რაც ქვეყანას სჭირდება. სანამ შეთანხმება არ არის, არაფერს არ ვიხილავთ და ეს ყველამ კარგად უნდა გაიგოთ“, – განაცხადა ვაშაძემ.
ცნობისთვის, დღეს ოპოზიციას და ხელისუფლებას შორის მოლაპარაკების მეოთხე რაუნდი გაიმართა, თუმცა მხარეები ერთიან პოზიციაზე ვერ შეთანხმდნენ.
