მელიამ უნდა დაასაბუთოს, რის საფუძველზე გვდებს ბრალს ოფისის დარბევაში და კრიმინალთან კავშირში, ან მოუწევს ცილისწამებაზე ბოდიშის მოხდა, – ამის შესახებ ქართული ოცნების წევრმა, ლევან კობიაშვილმა ნიკა მელიას ბრალდებების საპასუხოდ განაცხადა.
კობიაშვილის თქმით, სამართალდამცველები დაადგენენ, ვის ინტერესებში შედიოდა ნიკა მელიას ოფისის დარბევა და დამნაშავე უმკაცრესად აგებს პასუხს.
“არჩევნების დღიდან მოყოლებული, არ მინდოდა ჩემი ოპონენტის ბრალდებებზე კომენტარის გაკეთება. ვთვლიდი, რომ არეულობის ინსცენირება და უბნებთან დრამების დადგმა მათი ჩვეული საარჩევნო სტრატეგია იყო და ჩვენგან ყველაზე სწორი რეაქცია ამ სპექტაკლების იგნორირება იქნებოდა. როგორც ჩანს, ამ სიბინძურის დასრულებას არ აპირებს მაჟორიტარი დეპუტატობის კანდიდატი ნიკანორ მელია.
ახლა, როცა ვანდალიზმს და სისხლის სამართლის დანაშაულს გვაბრალებენ, უპასუხოდ ვერ დავტოვებ კანდიდატი მელიას ცილისწამებას.
ის ბრძოლის მეთოდები, რაც ამ პარტიას მისი არსებობის მანძილზე, 2003 წლიდან მოყოლებული ჰქონდა, არ შეცვლილა. მათ ვერ აუწყეს ფეხი ვერც დროს, ვერც ახალ პოლიტიკურ რეალობას და ვერც ამომრჩეველს.
მე არ მჩვევია მელიას სტილში ყაყანი და ბრალდებების უმისამართოდ ფრქვევა.
მის დონეზე არ და ვერ დავალ!
დარწმუნებული ვარ, სამართალდამცავი უწყებებები აუცილებლად დაადგენენ, თუ ვის ინტერესებში შედიოდა, რატომ და ვინ გააჩინა ხანძარი ნიკანორ მელიას ერთ-ერთ ოფისში და ყველა დამნაშავე უმკაცრესად აგებს პასუხს კანონის წინაშე.
კანდიდატმა მელიამ კი უნდა დაასაბუთოს, რის საფუძველზე გვდებს ბრალს ოფისის დარბევაში და კრიმინალთან კავშირში, ან მოუწევს ცილისწამებაზე ბოდიშის მოხდა.
მისგან განსხვავებით, ჩვენ ტელესპექტაკლებს არ ვდგამთ.
მას შემდეგ, რაც სიმართლე გაირკვევა, მოსახლეობა კიდევ ერთხელ დაინახავს მათ ნამდვილ სახეს და კიდევ ერთხელ გამოჩნდება სად არის სიმართლე და სად ამორალური ტყუილები!” – წერს ლევან კობიაშვილი.
შეგახსენებთ, რომ 16 ნოემბერს “ნაციონალური მოძრაობის” ლიდერის, ნიკა მელიას გლდანის შტაბს თავს დაესხნენ და დაწვეს. მოგვიანებით ნიკა მელიამ მომხდარზე კომენტარი გააკეთა და ლევან კობიაშვილი და კახი კალაძე შტაბზე თავდასხმის ორგანიზატორად დაასახელა.
ავტორი: ზურა დვალაშვილი
