ფრაქცია “დამოუკიდებელი დეპუტატების” ნაწილის მიერ დაფუძნებული პარტიის „ჩვენი საქართველო-სოლიდარობის ალიანსის“ წევრები საზოგადოებისთვის ცნობილ სახეებთან პოლიტიკურ კონსულტაციებს აწარმოებენ. ამის შესახებ „პრაიმტაიმთან“ პარტიის ერთ-ერთმა წევრმა გედევან ფოფხაძემ განაცხადა.
როგორც დეპუტატმა აღნიშნა, ამჟამად „ცნობილი სახეების“ ვინაობას ვერ დაასახელებს, რადგან მათთან კონსულტაციები, ჯერჯერობით, არ დასრულებულა.
„ცნობილ სახეებთან ვისთანაც გვაქვს კონსულტაცია, ამას ნამდვილად ვერ დავაანონსებთ, რადგან თუ გადაწყვეტილება არ იქნება მიღებული, იმ ხალხს უხერხულ მდგომარეობაში ვერ ჩავაგდებთ. ამ ხალხს ჯერ ჩვენთვის პასუხი არ მოუცია“,- განაცხადა ფოფხაძემ.
კითხვაზე, აწარმოებს თუ არა პარტია პოლიტიკურ კონსულტაციებს ეკონომიკის ყოფილ მინისტრთან, გიორგი ქობულიასთან, ფოფხაძე გვპასუხობს:
„მე არ ვიცი გიორგისთან კონსულტაციები ვის აქვს. ეს ადამიანი არ მინახავს დიდი ხანია“,- განცხადა ფოფხაძემ.
როგორც დეპუტატი აცხადებს, საკუთარ კანდიდატურას თბილისის ერთ-ერთ ოლქში დააყენებს, თუმცა სად – აღარ აკონკრეტებს.
„ველოდებით ოლქების საზღვრები განისაზღვრება თუ არა. მერე გადავნაწილდებით მთელ საქართველოში ოლქების მიხედვით. მე რომელ ოლქში ვიყრი კენჭს, ვერ გეტყვით, რადგან გადაწყვეტილება მიღებული არ არის. ჩემი ამოცანა არის შედეგზე ზეგავლენის მოხდენა. შესაბამისად, მე ყველაფერი უნდა გავაკეთო, რომ ჩვენი საქართველო ამ არჩევნებში გამარჯვებული დარჩეს“,- განაცხადა ფოფხაძემ.
ინფორმაციისთვის, საპარლამენტო არჩევნები 2020 წლის 31 ოქტომბერს შერეული სისტემით ჩატარდება. ეს იმას ნიშნავს, რომ პარლამენტში პროპორციული სიით 120-ს, ხოლო მაჟორიტარული საარჩევნო სისტემით 30 დეპუტატს აირჩევენ.
ავტორი: ეკატერინე ზარნაძე
