დავით გარეჯის საქმეზე, საქართველოს ინტერესების საწინააღმდეგო ქმედებების გამოძიების ფარგლებში, საქართველოში ჩამოვიდა ბიზნესმენი დავით ხიდაშელი, რომელმაც საქართველოს 1938 წლის რუკის დედანი დაუბრუნა.
ის ამ საკითხზე პრესკონფერენციის გამართვას გეგმავდა, თუმცა რამდნიმე წუთის წინ „პრაიმტაიმს“ პირველი განცხადება წერილობით მოგვაწოდა.
ბიზნესმენი წერილში აღნიშნავს, რომ გაოგნებულია საკითხისადმი ამგვარი დამოკიდებულებით.
„უკანასკნელი დღეების განმავლობაში რა არ მოვისმინე საკუთარ თავზე სხვადასხვა ტელევიზიებიდან: რომ თურმე ვარ სამშობლოს მოღალატე და ოკუპანტი სახელმწიფოს ჯაშუში; რომ მსოფლიოს არაერთ ქვეყანაში უდიდესი ძალისხმევის შედეგად მოძიებული უმნიშვნელოვანესი კარტოგრაფიული მასალის საქართველოში დაბრუნება – თურმე ქვეყნის მტრობა ყოფილა.
საქმე მხოლოდ უაპელაციო ბრალდებებში, ცილისწამებასა და ენითაუწერელ შეურაცხყოფებშიც არ არის, თუმცა, დამეთანხმებით, პოლიტიკიდან შორს მდგომი ადამიანისთვის და, განსაკუთრებით, მისი ოჯახისთვის, ესეც დიდი განსაცდელია. გადაჭარბების გარეშე ვიტყვი, რომ გაოგნებული ვარ საკითხისადმი ასეთი დამოკიდებულებით – მე ხომ აღნიშნული კარტოგრაფილი მასალა რომელიმე ხელისუფლებისთვის არ ჩამომიტანია.
მე ჩემს სამშობლოს, ჩვენი ქვეყნის ყველა მოქალაქეს, მათ შორის იმათაც, ვინც თავს მესხმის, ის მტკიცებულებები დავუბრუნე, რამაც ჩვენს ქვეყანას წელი უნდა გაუმაგროს მეგობარ აზერბაიჯანთან მოლაპარაკებების დროს, ნუთუ ქვეყნის სამსახური და მისი ინტერესების დაცვაში მოკრძალებული წვლილის შეტანა დანაშაულია. როგორც ჩანს, ზოგიერთებისთვის მართლაც ასეა, რადგან ერთი ტელევიზიის გენერალური დირექტორი პირდაპირ ეთერიდან დაპატიმრებითაც კი დამემუქრა. ცხადია, რომ ამ კატეგორიის ხალხს კითხვებზე პასუხის მოსმენა საერთოდ არ სურთ“,- ნათქვამია ბიზნესმენის განცხადებაში.
