დებატები რა პრობლემაა?! რა თქმა უნდა, უნდა ჩატარდეს – ძალიან კარგია ბატონ გახარიას თუ აქვს ეს სურვილი, მივესალმები, – ამის შესახებ „ნაციონალური მოძრაობის“ ლიდერმა ნიკა მელიამ განაცხადა.
მისივე თქმით, დებატები წინასაარჩევნო კამპანიაში რამდენჯერმე უნდა გაიმართოს.
„დებატებისგან არავინ არასდროს არ გაიქცევა. მე ვფიქრობ, ბატონი კალაძე უნდა ჩადგეს მდგომარეობაში, მოიკრიბოს ძალები და ყველა წამყვან ტელეკომპანიას უნდა მიეცეს შესაძლებლობა, რომ დებატები გაიმართოს თბილისის მერობის კანდიდატებს შორის. იმედია, ბატონი კალაძე არ დაიხევს უკან. თუ დაიხევს უკან, საკუთარ თავს დამატებით დიდ ზიანს მიაყენებს. დებატები რა პრობლემაა? რა თქმა უნდა, უნდა ჩატარდეს, ეს ტრადიცია უნდა დამკვიდრდეს. ბუნებრივია, არა ერთი და ორი, უფრო მეტჯერაც უნდა გაიმართოს წინასაარჩევნო კამპანიაში დებატები. ძალიან კარგია ბატონ გახარიას თუ აქვს ეს სურვილი, მივესალმები, ბატონმა კალაძემ უნდა თქვას, რომ მაგარი ბიჭია“, – განაცხადა მელიამ.
