ჯანდაცვის კომიტეტის თავმჯდომარე, დიმიტრი ხუნდაძე კიდევ ერთხელ განმარტავს, რატომ არის საჭირო „საზოგადოებრივი ჯანმრთელობის შესახებ“ კანონის ვადის გახანგრძლივება პირველ იანვრამდე.
როგორც ის ამბობს, შემდეგი მოწვევის პარლამენტსაც უნდა ჰქონდეს საშუალება ამ კანონპროექტში საჭიროების შემთხვევაში გადაწყვეტილება მიიღოს.
„პირველ იანვრამდე იმიტომ რომ ვფიქრობ, შემდეგ პარლამენტსაც უნდა ჰქონდეს ის პასუხისმგებლობა, რომ საჭიროების შემთხვევაში მიიღოს ამ კანონის ვადის გაგრძელებაზე გადაწყვეტილება.
მე თუ მკითხავთ, გონივრული ვადა არის პანდემიის არსებობის ვადა, რომელიც მსოფლიო ორგანიზაციის მიერ არის დაწესებული“,- განაცხადა დიმიტრი ხუნდაძემ.
ცნობისთვის, ამ წუთებში პარლამენტში „საზოგადოებრივი ჯანმრთელობის შესახებ“ კანონს განიხილავენ.
პარლამენტმა აღნიშნული კანონი კორონავირუსის წინააღმდეგ ბრძოლის მიზნით მიიღო და კონკრეტული ღონისძიებები განსაზღვრა, რომელთა მოქმედების ვადად 2020 წლის 15 ივლისი განისაზღვრა.
კანონის მიხედვით, მთავრობას შემზღუდავი ღონისძიებების გატარება საგანგებო მდგომარეობის გამოცხაების გარეშეც შეეძლება.
