„ძალიან სამწუხაროა, ადამიანურადაც გული დაგვწყვიტა. ეტყობა ყველას ვერ გაგვიგია რა გამოწვევაა ქვეყანაში“,- ასე ეხმაურება „ნაციონალური მოძრაობის“ წევრი, ნიკა მელია, გრიგოლ ვაშაძის განცხადებას.
როგორც ნიკა მელია აღნიშნავს, ახლა ისეთი დროა, ნებისმიერი განცხადების გაკეთების დროს, ყველა ფრთხილად უნდა იყოს.
„ქვეყნის განვითარების უმნიშვნელოვანეს ეტაპზე ვართ, რომელიც აუცილებლად დასრულდება ხალხის გამარჯვებით. ნებისმიერი განცხადების გავრცელების დროს უნდა ვიყოთ მაქსიმალურად ფრთხილად. როდესაც განცხადება ვრცელდება და ეს აზრთა სხვადასხვაობას იწვევს, ეს უკვე არ არის საუკეთესო განცხადება.
სამწუხაროა, რომ ამის შესახებ არავინ ვიცოდით. გაუგებარია მით უფრო, როდესაც პარტიაში არსებობს პრესსამსახური და არასდროს ბატონ გრიგოლს განცხადება არ გაუკეთებია პრესსამსახური გვერდის ავლით და ეს იყო ერთადერთი შემთხვევა. ძალიან სამწუხაროა, ადამიანურადაც გული დაგვწყვიტა. ეტყობა ყველას ვერ გაგვიგია რა გამოწვევაა ქვეყანაში.
მთავარი, რაც აქვს ფართო საზოგადოებას გაცხადებული არის ის, რაც გაცხადებულია რუსთაველის გამზირზე. ჩვენ ვიბრძვით ქვეყანაში არჩევნების შესაძლებლობისთვის“,- განაცხადა ნიკა მელიამ.
შეგახსენებთ, გრიგოლ ვაშაძემ გაავრცელა განცხადება, სადაც ოპოზიციურ პარტიებს მოუწოდებს, რომ მოლაპარაკების მაგიდასთან დასხდნენ.
