„2020 წლის ერთიან ეროვნულ გამოცდებში რეგისტრირებულ აბიტურიენტთა 94 პროცენტმა მიიღო მონაწილეობა“ – ამის შესახებ შეფასებისა და გამოცდების ეროვნული ცენტრის ხელმძღვანელმა, სოფო გორგოძემ განაცხადა.
მისი თქმით, ორი ძირითადი მიზანი, რომელიც ეროვნული გამოცდების პროცესში იყო დასახული, მიღწეულია.
„დასრულდა ერთიანი ეროვნული გამოცდები და სტუდენტთა საგრანტო კონკურსი. მოგეხსენებათ, ორი ძირითადი მიზანი გვქონდა, როცა ვიწყებდით ერთიან ეროვნულ გამოცდებს. ერთი გახლდათ, რომ პანდემიის პირობებში შეგვექმნა აბიტურიენტებისთვის ისეთი გარემო, მათ მაქსიმალურად შეძლებოდათ გამოევლინათ თავიანთი ცოდნა და უნარები, მეორე – მასშტაბური ღონისძიების დროს თავიდან აგვეცილებინა კორონავირუსის გავრცელების საფრთხე. ვფიქრობ, სხვადასხვა უწყების ერთობლივი და კოორდინირებული მუშაობის შედეგად, ორივე მიზანი მიღწეულია და თითოეულ უწყებას და თითოეულ ადამიანს, ვინც ამ პროცესში იყო ჩართული, მინდა, დიდი მადლობა გადავუხადო“, – განაცხადა შეფასებისა და გამოცდების ეროვნული ცენტრის ხელმძღვანელმა.
ამასთან, გორგოძის თქმით, ერთიანი ეროვნული გამოცდები დასრულდა, მაგრამ საგამოცდო პროცესი გრძელდება 4 აგვისტოს ჩათვლით.
„მასწავლებლობის მსურველებისთვის გრძელდება ეს პროცესი, ასევე მაგისტრობის მსურველები, რომლებიც 1 და 4 აგვისტოს ჩათვლით გაივლიან ტესტირებას“, – განაცხადა გამოცდების ცენტრის ხელმძღვანელმა.
ასევე როგორც მან განმარტა, ოკუპირებული ტერიტორიებიდან აბიტურიენტები, რომლებიც ვერ ახერხებენ გამოცდების ჩაბარებას, სპეციალური წესით ჩაირიცხებიან უმაღლეს სასწავლებლებში.
„რაც შეეხება აბიტურიენტებს ოკუპირებული ტერიტორიებიდან, მათთვის არსებობს ჩარიცხვის განსხვავებული წესი, შესაბამისად ისინი ამ ალტერნატიული წესის საფუძველზე ჩაირიცხებიან. თუმცა თუ ზოგიერთმა მათგანმა მოახერხა და ჩააბარა გამოცდები, ჩვეულებრივ მონაწილეობს ამ პროცესში, წინააღმდეგ შემთხვევაში, ალტერნატიული წესით, რომელიც განათლებისა და მეცნიერების სამინისტროს აქვს მომზადებული ამის შესახებ“, – განაცხადა გორგოძემ.
