საქართველოს ყოფილი პრეზიდენტი და „ერთიანი ნაციონალური მოძრაობის“ ლიდერი მიხეილ სააკაშვილი 2020 წლის საპარლამენტო არჩევნების შედეგებს პროგნოზირებს. სააკაშვილი მიიჩნევს, რომ „ენმ – ძალა ერთობაშია“ 40-50% -ს აიღებს და ერთპიროვნულად დაამარცხებს „ქართულ ოცნებას“.
„ნაციონალურ მოძრაობას“, ამ შემთხვევაში, გაერთიანებულ ოპოზიციას, შეუძლია, ერთპიროვნულად დაამარცხოს ივანიშვილი. მას შემდეგ, რაც დავამარცხებთ ივანიშვილს, მაქსიმალურად ფართოდ ჩავრთავთ სხვადასხვა პოლიტიკურ სუბიექტებს და არამხოლოდ პოლიტიკურ სუბიექტებს, ქვეყნის მართვის პროცესში” – მიხეილ სააკაშვილი.
„ნაციონალური მოძრაობის“ მსგავსად, ერთპიროვნულ მმართველობას აანონსებს „ქართული ოცნება“. აღმასრულებელი მდივნის, ირაკლი კობახიძის თქმით, 2020 წლის არჩევნების შემდეგ, კოალიციური მთავრობა გამორიცხულია.
„დღევანდელი განწყობა არის ასეთი, რომ კოალიციური ხელისუფლება გამორიცხულია, რადგან „ქართულ ოცნებას“ თავისუფლად შეუძლია, ერთპარტიულად მთავრობის ფორმირება და ეს არის ძალიან მნიშვნელოვანი, რათა სტაბილურად გაგრძელდეს ჩვენი დემოკრატიული განვითარება“ – ირაკლი კობახიძე
„ევროპული საქართველო“ კი მუდმივად კოალიციის შექმნაზე საუბრობს. როგორც გიგა ბოკერია აცხადებს, მათი მიზანი „ქართული ოცნების“ დამარცხებაა და მთავარი პრობლემა წინასაარჩევნო გარემოს პოლარიზებაშია.
„კმაყოფილი ვიქნებით როცა დავამარცხებთ მიძინა ივანიშვილს და შევკრავთ კოალიციას „ევროპული საქართველოს“ ლიდერობით. ივანიშვილი შეეცდება პოლარიზებას, სააკაშვილის სახელს ახსენებენ ხშირად, მათი პროპაგანდაა, რომ ოპოზიცია არის მხოლოდ სააკაშვილი. „ევროპული საქართველოს“ ამოცანაა, რომ ეს არ მოხდეს. ამ არჩევნებში ჩვენ გვჭირდება გარდამტეხი ცვლილებები და არა ვიღაცის ხელისუფლებაში დაბრუნება, სააკაშვილის მათ შორის“- გიგა ბოკერია
„ლეიბორისტული პარტიის“ ლიდერი შალვა ნათელაშვილი, რომელიც ოპოზიციური ერთობის მუდმივი მასპინძელია, მიხეილ სააკაშვილს მოუწოდებს ოპოზიციური პარტიების თანამშრომლობას და კოორდინაციას ხელი შეუწყოს. ნათელაშვილის თქმით, სააკაშვილმა თანამდებობებზე ოცნებას თავი უნდა დაანებოს.
„მე მოვუწოდებ მიხეილ სააკაშვილს თანამდებობაზე ოცნებებს თავი დაანებოს. საკმარისია, ის ვალდებულია მორალურად, პოლიტიკურად ხელი შეუწყოს ოპოზიციური ძალების თანამშრომლობას, კოორდინაციას, პუტინისტური რეჟიმის მოცილებას, ჩვენი ქვეყნის განვითარების ახალ სიმაღლეებზე გადაყვანას და არცერთ შემთხვევაში არ მოგვაბეზროს თავი პრემიერ-მინისტრობით, პოლიტიკური მითითებებით, პოლიტიკური რეიტინგებით და საკუთარ სიაში ივანიშვილის ოლიგარქთა ჩაწერით“,- შალვა ნათელაშვილი.
პოლიტიკის ექსპერტი გია ხუხაშვილი პარტიების ერთპიროვნულად გამარჯვების შანსებს განიხილავს და მთავარი პოლიტიკური სუბიექტების მხრიდან კოალიციის გამორიცხვას, ტექნოლოგიურ მეთოდად აღიქვამს. ხუხაშვილი მიიჩნევს, რომ ერთპიროვნული გამარჯვების შანსი „ქართულ ოცნებას“ აქვს, ხოლო რაც შეეხება, „ნაციონალურ მოძრაობას“, არჩევნების შემდეგ, ოპოზიციურ პარტიებთან კოალა~იციაზე საუბარს დაიწყებს.
„ერთადერთი შანსი ერთპიროვნული გამარჯვების აქვს „ქართულ ოცნებას“, ამას აჩვენებს ძალიან ოპოზიციურად განწყობილი კვლევებიც. სხვას, მითუმეტეს „ნაციონალურ მოძრაობა – ძალა ერთობაშიას“ ექსკლუზიურად გამარჯვების შანსი არ აქვს. პოლიტიკის თამაშის წესია ასეთი, პოლიტტექნოლოგიურად ამომრჩეველში მხნეობა უნდა გააღვიძო და მოახდინო ძალის დემონსტრირება. რომც იცოდე, რომ ვერ იგებ მაინც უნდა იძახო, რომ იგებ. არ მგონია, რომ სააკაშვილი ისეთი სულელია, არ ესმოდეს. ამით პოლიტიკურ ამოცანას მიმართავს, რომ მაქსიმალურად მოაბილიზოს ამომრჩეველთა ხმები.
სააკაშვილი ეხლა ლაპარაკობს ასე, როცა არჩევნები ჩაივლის, ის კოალიციაზე ისაუბრებს, ეს ყველამ იცის, ვინც პოლიტიკითაა დაკავებული. პოსტსაარჩევნო პერიოდში ეს მოლაპარაკებები შედგება“ – განაცხადა გია ხუხაშვილმა „პრაიმტაიმნიუსთან“.
2020 წლის საპარლამენტო არჩევნების შემდეგ, კოალიციის ფორმირების მნიშვნელობაზე საუბრობენ საერთაშორისო პარტნიორებიც. ევროპარლამენტარი მწვანეთა ალიანსიდან მარკეტა გრეგოროვა მიიჩნევს, რომ ოპოზიციას, კოალიციის ფორმირების შემთხვევაში, და „ქართულ ოცნებას“, ერთნაირი პროცენტული მაჩვენებლები ექნებათ.
„ჩემი ამჟამინდელი ვარაუდით, „ქართული ოცნება“ დაკარგავს ბევრ პროცენტს, იმასთან შედარებით, რაც მანამდე ჰქონდა, წინა არჩევნებში. ასევე, გამოკითხვები აჩვენებს, რომ ძალიან დაბალანსებულია პოტენციური კოალიციების კუთხით. „ქართული ოცნება“ კოალიციაში შევა ან „პატრიოტთა ალიანსთან“, ან რომელიმე სხვა მცირე ზომის პარტიასთან, რადგან, 1%-იანი მაჩვენებელიც კი ძალიან მნიშნველოვანია ახლა და ბევრი რამ შეიძლება შეცვალოს.
ამასთანავე, ოპოზიციის ბლოკი „ქართული ოცნების“ წინააღმდეგია და თუ ძალებს გააერთიანებენ მთავრობის შესაქმნელად, თითქმის ერთნაირი პროცენტული მაჩვენებლები აქვთ.“- მარკეტა გრეგოროვა
