„ქართული ოცნების” აღმასრულებელმა მდივანმა ირაკლი კობახიძემ განაცხადა, რომ 8 საათისთვის „ევროპული საქართველო” საარჩევნო უბნებთან ხელოვნური რიგების შექმნას გეგმავს.
„მოვუწოდებთ ყველას, მშვიდად მიიღონ არჩევნების შედეგები და საარჩევნო კომისიას მისცენ შეუფერხებლად მუშაობის შესაძლებლობა.
გვაქვს ერთი მცირე ინფორმაცია, „ევროპული საქართველო” 8 საათისთვის გეგმავს ხელოვნური რიგების შექმნას, მათ შორის იმ აქტივისტების მონაწილეობით, რომელთაც უკვე მიცემული აქვთ ხმა.
წესს შეგახსენებთ, წესი არის შემდეგი: როდესაც 8 საათისთვის იხურება უბნები, ამოწმებენ ვინ დგას რიგში და მათ აქვთ ხმის მიცემის საშუალება. ამის გაპროტესტებას გეგმავენ, რაც კანონსაწინააღმდეგოა.
კიდევ ერთხელ ყველას მოვუწოდებ აქტიურობისკენ, მოგიწოდებთ გაიზიაროთ „ქართული ოცნების” გამარჯვება და მონაწილეობა მიიღოთ არჩევნებში,”-განაცხადა ირაკლი კობახიძემ.
დღეს, 31 ოქტომბერს საქართველოში საპარლამენტო არჩევნები მიმდინარეობს. ამომრჩეველთა ერთიან სიაში სულ 3 205 634 ამომრჩეველია რეგისტრირებული. ქვეყნის მასშტაბით გახსნილია 3 657 საარჩევნო უბანი. იმ ამომრჩევლებისთვის, რომლებიც იმყოფებიან სამკურნალო დაწესებულებებში, კარანტინსა და თვითიზოლაციაში, ცალკე დამატებით შეიქმნა 127 სპეციალური საარჩევნო უბანი.
არჩევნებში 48 პოლიტიკური პარტია და ორი საარჩევნო ბლოკი მონაწილეობს.
ყველა ინფორმაცია საპარლამენტო არჩევნებთან დაკავშირებით ნახეთ ამ ბმულზე
