სტრასბურგის სასამართლომ რუსეთის გამამტყუნებელი განაჩენი გამოიტანა. ვულოცავ საქართველოსა და ქართველ ხალხს ამ სამართლებრივ ბრძოლაში მორიგ უმნიშვნელოვანეს გამარჯვებას!, – ამის შესახებ „ნაციონალური მოძრაობის“ წევრმა, გიორგი ბარამიძემ განაცხადა.
„მიუხედავად საქართველოს დღევანდელი ხელისუფლების მოღალატური განცხადებებისა, რომ თითქოს “ომი საქართველომ დაიწყო”, რაც ბუნებრივია რუსეთის პოზიციებს აძლიერებდა, სასამართლომ ობიექტურად იმსჯელა და განიხილა საკითხი და ერთადერთი სამართლიანი ვერდიქტი გამოიტანა, რითიც იურიდიულადაც დაადასტურა, რომ რუსეთი ოკუპანტია, რომელმაც ჩვენს ტერიტორიებზე განახორციელა ეთნიკური წმენდა და ადამიანის სიცოცხლისა და სხვა უამრავი უფლებების უხეში დარღვევები, რისთვისაც მოვა დრო და პასუხს აგებენ. დიდება საქართველოს, დიდება სამშობლოსთვის დაღუპულ გმირებს, დიდება ჩვენს ხალხს. გაისად სოხუმსა და ცხინვალში“, – განაცხადა ბარამიძემ.
დღეს, 21 იანვარს, 2008 წლის ომის საქმეზე სტრასბურგის სასამართლომ გადაწყვეტილება გამოაცხადა.
საქართველოს იუსტიციის სამინისტროს ინფორმაციით, ადამიანის უფლებათა ევროპული სასამართლო დაეთანხმა საქართველოს მოთხოვნას, რომ რუსეთმა 2008 წლის აგვისტოს ომის დროს ადამიანის უფლებათა ევროპული კონვენციის არაერთი მუხლი დაარღვია.
