მოლაპარაკების იდეა იმაშია, რომ ორივე მხარემ უნდა დათმოს. თუ ერთი მხარე ამბობს, რომ არაფერს არ დათმობს, მაშინ ის არ იღებს მონაწილეობას და მისი მიზანია, რომ ჩაიშალოს მოლაპარაკებები, – ამის შესახებ „გირჩის” ერთ-ერთმა ლიდერმა, სანდრო რაქვიაშვილმა განაცხადა.
მისივე თქმით, ხელისუფლებასაც და ოპოზიციასაც მოუწევს, რაღაც დათმოს.
„იმედი მაქვს, რომ გავა ერთი კვირა, ორი კვირა, დავისვენებთ, შევჭამთ საცივს და მერე დავფიქრდებით, რომ მართლა დიდი პრობლემის წინაშე ვდგავართ. ძალიან ვნერვიულობ, მაგრამ ბევრი ოპოზიციონერი და „ქართული ოცნების“ წარმომადგენელი ფიქრობს, რომ რაღაც გართობაა. ზოგი ხუმრობს, მე კი მიმაჩნია, რომ ასე შეიძლება ძალიან ცუდი შედეგი მივიღოთ, რომელიც ყველას დაგვაზიანებს. ამიტომ, როგორც კი, ამას დავინახავთ, მგონი, სხვა ემოციით მივუდგებით მოლაპარაკებებს და მარტივად ვიპოვით კომპრომისს.
ზოგადად, მოლაპარაკების იდეა იმაშია, რომ ორივე მხარემ უნდა დათმოს. თუ ერთი მხარე ამბობს, რომ არაფერს არ დათმობს, მაშინ ის არ იღებს მონაწილეობას და მისი მიზანია, რომ ჩაიშალოს მოლაპარაკებები. ამიტომ, ყველას მოგვიწევს რაღაცები დავთმოთ“, – განაცხადა რაქვიაშვილმა.
