ისრაელი კორონავირუსის „დელტა“ ვარიანტისგან დაცვის მიზნით, 60 წელს ზემოთ მყოფი პირებისთვის ვაქცინის მესამე დოზის გაკეთებას განიხილავს.
ინფორმაციას Reuters-ი ქვეყნის ჯანდაცვის უწყების წარმომადგენელზე დაყრდნობით ავრცელებს.
„ეს დიდი დილემაა. გადაწყვეტილების მიღება ჩვენზეა დამოკიდებული მაშინ, როდესაც მსოფლიოს მხარდაჭერა არ გვაქვს. ეს ძალიან რთული გადაწყვეტილებაა. ერთი მხრივ, გვსურს დავინახოთ, რომ ეს უსაფრთხო და ეფექტურია და დავეყრდნოთ ჩვენს მონაცემებს, თუ რამდენად მცირდება იმუნიტეტი, ხოლო მეორე მხრივ, არსებობს ეპიდემიის აფეთქება და ჩვენ გვსურს ეს აფეთქება შევაჩეროთ“, – აღნიშნა ისრაელის ჯანდაცვის სამინისტროს გენერალურმა დირექტორმა, ნახმან აშმა.
