იტალიის სააპელაციო სასამართლომ, ბოლონიის სასამართლოს განჩინება, საქართველოს მოქალაქის რუსეთისათვის გადაცემის თაობაზე, ძალაში დატოვა.

4 დეკემბერს გამართულ სხდომაზე, სასამართლომ მიიჩნია, რომ პირველი ინსტანციის სასამართლომ , ახმეტის მუნიციპალიტეტის სოფელ მატანში მცხოვრები, წითელი ცირკულარით ძებნილი, 42 წლის ბორის წიკლაურის რუსეთისათვის გადაცემის გადაწყვეტილება, სამართლებრივად სწორად დაასაბუთა.

ოჯახის ახლო ნათესავები თვლიან, რომ სასამართლოს ვერდიქტი, სამართლიანი არ არის.

განჩინება უსამართლოა. მან სასჯელი უკვე მოიხადა. ამ გადაწყვეტილებას, ადამიანის უფლებათა ევროპულ სასამართლოში გავასაჩივრებთ- განაცხადა ბორის წიკლაურის ნათესავმა, ნათია მექუდიშვილმა.

როდის დაიწყება წიკლაურის რუსეთში ექსტრადირების აღსრულება, ჯერჯერობით ცნობილი არ არის.

ბოლონიის სასამართლომ, საქართველოს მოქალაქის რუსეთში ექსტრადირების განჩინება , 11 სექტემბერს გამოიტანა.

პატიმრის ოჯახი, დაკავებულის საქართველოსათვის გადაცემას ითხოვს. ამ მოთხოვნით, წიკლაურის ნათესავებმა, საპროტესტო აქცია რამდენჯერმე ჩაატარეს.

რუსეთის ფედერაცია, ბორის წიკლაურს, 1999 წელს ჩადენილ გაუფრთხილებლობით მკვლელობას ედავება, რისთვისაც მან სასჯელი უკვე მოიხადა.

სასჯელის მოხდის შემდეგ, წიკლაური საქართველოში საქმიანობდა და მხოლოდ 2015 წელს, აზერბაიჯანის რესპუბლიკაში გადასვლის დროს შეიტყო, რომ მას წითელი ცირკულარით ეძებდნენ.

2020 წელს, ის იტალიაში გაემგზავრა, სადაც დააპატიმრეს.

ავტორი: ხათუნა გულიაშვილი