დღეს 18 წლამდე ასაკის ბავშვებისთვის 200-ლარიანი დახმარების მისაღებად რეგისტრაცია დაიწყო. ტექნიკური ხარვეზის გამო, მითითებულ საიტზე რეგისტრაცია შეფერხებით მიმდინარეობდა. როგორც უწყებაში განმარტეს, ხარვეზი პორტალზე ბევრი ადამიანის ერთდროულად დარეგისტრირებამ განაპირობა.
ჯანდაცვის მინისტრის მოადგილის, თამარ გაბუნიას თქმით, ჯანდაცვის სამინისტროს ტექნიკური სამსახური ამ ხარვეზის გამოსწორებაზე მთელი დღის განმავლობაში მუშაობდა.
„დღეს გააქტიურდა ის პორტალი, სადაც ბავშვებისთვის 200-ლარიანი დახმარების მისაღებად მოქალაქეები უნდა დარეგისტრირდნენ. დღეს იყო პირველი დღე და ყველა ელოდა მის გახსნას და როგორც ჩანს, ძალიან ბევრი მომხმარებელი ერთდროულად დარეგისტრირდა და შემოვიდა სისტემაში, რამაც გამოიწვია სისტემის გადატვირთვა.
მომდევნო დღეებიდან ჩვენ უკვე აღარ მოველით შეფერხებებს, თუმცა თხოვნა გვექნება, რომ დრო არის საკმარისი იმისთვის, რომ თუნდაც თვის ბოლომდე, ეტაპობრივად დარეგისტრირდნენ დახმარების მიმღებები და ამრიგად აღარ გვექნება ამგვარი შემთხვევა, რომელიც დღეს დაფიქსირდა. ამდენად ჩვენ ვფიქრობთ, რო აღარ უნდა იყოს ხარვეზები, მაგრამ თუ მაინც დაფიქსირდა, დაგვიკავშირდნენ, გვაცნობონ ამის შესახებ და რა თქმა უნდა, ვეცდებით, მაქსიმალურად სწრაფად გამოსწორდეს ეს ხარვეზი და ყველა ბავშვმა მიიღოს მისი კუთვნილი დახმარება“- განაცხადა თამარ გაბუნიამ.
