ჯანმრთელობის ეროვნული სააგენტო პაციენტებს კარდიოდეფიბრილატორებს უსასყიდლოდ გადასცემს.

ეკატერინე ტიკარაძემ განაცხადა, რომ დეფიბრილატორების ბენეფიცირებისთვის უსასყიდლოდ გადაცემის პროექტი მთავრობის 520-ე დადგენილებას უკავშირდება, რომელშიც ერთი კომპონენტი ეხებოდა დეფიბრილატორების ღირებულებას, ხარისხსა და შეძენის შესაძლებლობას.

„შევჯერდით იმასთან დაკავშირებით, როგორი უნდა იყოს დეფიბრილატორის ტიპოლოგია, რომელიც სრულად დააკმაყოფილებდა საერთაშორისო სტანდარტებს. გავითვალისწინეთ პაციენტის ინტერესებიც, ჩატარდა ფასთა კვლევა, გაიმართა ტენდერი და 7 დეკემბერს გამოვლინდა გამარჯვებული კომპანია. ესაა კომპანია „მოწინავე სამედიცინო ტექნოლოგიები“, რომელიც სახელმწიფოს მიაწვდის Medtronic-ის ამერიკული წარმოების დეფიბრილატორებს.

ამ ტენდერმა მოგვცა იმის საშუალება, რომ პროგრამის ღირებულება 2,2-ჯერ შეგვემცირებინა. შესყიდვის ჯამური ღირებულებაა 2 566 180 ლარი, შესყიდული იქნება 224 დეფიბრილატორი, რომლებიც კლინიკებში გადანაწილდება. მომსახურების ღირებულება დადგინდება 3000-3500 ლარამდე, საიდანაც მოსახლეობას ჯიბიდან 10%-ს გადახდა მოუწევს“, – განაცხადა ტიკარაძემ.