„კახეთში კოვიდ ვაქცინაციის რეგიონული გეგმა შეიქმნება“- ამის შესახებ პრაიმტაიმს დაავადებათა კონტროლის ცენტრის კახეთის განყოფილების ხელმძღვანელმა განუცხადა.

ნელი ხიზანიშვილის ინფორმაციით, გეგმა მთავრობის 60 გვერდიან დოკუმენტთან იქნება შესაბამისობაში.

„60 გვერდიანი დოკუმენტი, მთავრობამ საკოორდინაციო საბჭოს უკვე წარუდგინა. დღეს-ხვალ დამტკიცდება. ამ გეგმაში დეტალურად არის გაწერილი, საქართველოში შემოსასვლელი ყველა შესაძლო ვაქცინის ლოჯისტიკური, ტექნიკური და სხვა მახასიათებლები. ძირითადად, სამი სახის ვაქცინა განიხილება. მალე დაიწყება სინფორმაციო კამპანია, რომელშიც მედიის ჩართვა ძალიან მნიშვნელოვანია. ამასთან, შევქმნით ვაქცინაციის რეგიონული გეგმას და შეაძლოა ასეთი გეგმა გავაკეთოთ მუნიციპალიტეტების მიხედვითაც“- განაცხადა ხიზანიშვილმა.

შეხვედრა ვაქცინაციასთან დაკავშირებულ საკითხებზე, კახეთის გუბერნატორისა და მუნიციპალიტეტების მერების მონაწილეობით, სამხარეო ადმინისტრაციაში 20 იანვარს ჩატარდა.

დისტანციური წესით გამართულ შეხვედრას, დაავადებათა კონტროლის ცენტრის ხელმძღვანელი, ამირან გამყრელიძე და ამერიკაში მცხოვრები თელაველი ექიმი, დავით მრელაშვილიც ესწრებოდნენ.

ჯანდაცვის სამინისტროს განმარტებით, პირველი პრიორიტეტული ჯგუფი, რომელსაც ვაქცინაცია ჩაუტარდება, არის სამედიცინო პერსონალი, შემდეგ ხანგრძლივი მოვლის დაწესებულელების ბენეფიციარები და მათი მომვლელები, შემდეგ 75 წლის ასაკის მოსახლეობა, ასევე 65 წლის ასაკის მოქალაქეები შემდეგ კი, 55 წლის ასაკის პირები. ვაქცინაციის გეგმაში გათვალისწინებულია ქრონიკული დაავადებების მქონე მოქალაქეებიც.

ვაქცინაცია ნებაყოფლობითია და ის მოსახლეობისთვის უსასყიდლო იქნება.

ავტორი: ხათუნა გულიაშვილი