პარტია “მოქალაქეების” ერთ-ერთი ლიდერის, ალეკო ელისაშვილის განცხადებით, კანონის წინაშე ყველა თანასწორი უნდა იყოს, მათ შორის, “ნაციონალური მოძრაობის” თავმჯდომარე ნიკა მელია. მისივე თქმით, მელიამ გირაოს თანხა უნდა გადაიხადოს, ამის შესახებ მან “პირველი არხის” ეთერში განაცხადა.
„კანონის წინაშე ყველა უნდა ვიყოთ თანასწორი, ყველაზე დიდი ოპოზიციური პარტიის თავმჯდომარე ხარ, არ ხარ, უნდა იყო თანასწორიცოტა გაუგებარია, რომ იცით რა, თანხას არ გადავიხდი. არ მგონია, რომ მელიას მხარდამჭერებისთვის ან „ნაციონალური მოძრაობის“ მხარდამჭერებისთვის უმჯობესი იყოს, რომ ნიკა მელია გირაოს თანხის არგადახდის გამო იჯდეს ციხეში, ვიდრე იყოს გარეთ. ვინ რის გადახდას აპირებს, სიმართლე გითხრათ ეგ არ ვიცი, ნიკა მელიასგან მოვისმინე. ცოტა ღიმილისმომგვრელი იქნება, გირაოს თანხა რომ არ გინდა გადაიხადო და ვიღაც სხვა გიხდის დაჟინებით“, – განაცხადა ალეკო ელისაშვილმა.
იმ შემთხვევაში, თუ ნიკა მელია გირაოს თანხას არ გადაიხდის, პროკურატურა სასამართლოს მისთვის აღკვეთის ღონისძიების სახით პატიმრობის შეფარდების შუამდგომლობით მიმართავს. გირაოს თანხის გადასახდელად დამატებითი ერთკვირიანი ვადა დღეს იწურება.
