„ქართული ოცნების“ დეპუტატი, გურამ მაჭარაშვილი „გირჩის” ერთ-ერთი ლიდერის, იაგო ხვიჩიას განცხადებას ეხმაურება და ამბობს, რომ მუქარა და დამუნათება „ნაციონალური მოძრაობის“ სტილია.
მისივე თქმით, მმართველი გუნდი ოპოზიციის შორის მოლაპარაკებებში ვერ ჩაერევა.
„სამწუხაროდ, მუქარა და დამუნათება „ნაციონალური მოძრაობის“ სტილია. ხელისუფლებაში ყოფნის დროს ერთგვარ სიმბოლოდ ცოცხი აქციეს და ახლა ნაგვის ურნებს აქცევენ.
ოპოზიციის წარმომადგენლებს შორის წარმოებულ მოლაპარაკებებში ვერ ჩავერევით. რაც შეეხება იარაღის ტარებას, პარლამენტის წევრი დაცულია იმუნიტეტით, თუმცა პარლამენტის წევრი საჯარო პირია და თავისი ავტორიტეტითა და საქმიანობით იმას უნდა იმსახურებდეს, რომ თავად შეძლოს საზოგადოებაში ავტორიტეტის აწევა. ბუნებრივია, პარლამენტი მისი წევრის იმუნიტეტს დაიცავს, მაგრამ მათ შორის მოლაპარაკებები მათი საქმეა. სახარბიელო არ არის, რომ ძლიერი საპარლამენტო ოპოზიცია არ გვყავს. ეს კარგი იქნებოდა ქვეყნისთვის და ჩვენთვისაც. ერთი ჩამოყალიბებული აზრი არ აქვთ, ამას საზოგადოება ხედავს, ამიტომაც მათი რეიტინგი ძალიან დაბალია და ჩვენ მაქსიმალურად შევეცდებით, რომ პარლამენტიდან საპარლამენტო ოპოზიციას ხელი შევუწყოთ, რომ თავისი ფუნქცია შეასრულონ ისე, როგორც ეს საქართველოს მოსახლეობის დაკვეთაა“,- განაცხადა გურამ მაჭარაშვილმა.
ცნობისთვის, „გირჩის“ ერთ-ერთმა წევრმა იაგო ხვიჩიამ განაცხადა, რომ „ნაციონალური მოძრაობის“ წევრი ნიკა მელია მასზე განაწყენებულია და სატელეფონო საუბრის დროს მოეჩვენა, რომ დაემუქრა.
