„არ ვისურვებდი, რომ ის კანონად იქცეს და დამტკიცდეს, რადგან ეს რეალურად, ქვეყნისთვის პირველი ღია სანქციის დაწესება იქნება“,- ამის შესახებ დამოუკიდებელმა დეპუტატმა, ეკა ბესელიამ აშშ-ის წარმომადგენელთა პალატის მიერ გამოქვეყნებულ კანონპროექტთან დაკავშირებით განაცხადა.
მისი თქმით, მსგავს ქმედებას უარეს შემთხვევაში შესაძლებელია, სანქციაც დაერქვას.
„ამ გადაწყვეტილებით შეიძლება სწორედ მოიაზრებოდეს ის უნდობლობა, ნიჰილიზმი თუ იმედგაცრუება, რაც ბოლო პერიოდის არადემოკრატიულმა პროცესებმა გამოიწვია. ამიტომ, ხელისუფლების ადგილას არ შევხედავდი ამ პროცესს მშვიდად და ასე გულარხეინად არ გავაკეთებდი კომენტარებს, რადგან უნდა დაფიქრდნენ, რამდენად სერიოზული სიგნალია მსგავსი მიდგომა, როდესაც წლიდან წლამდე პირიქით იზრდებოდა საქართველოს მხარდაჭერა აშშ-ის მხრიდან და ეს მხარდაჭერა ბევრი სხვადასხვა მიმართულებით გამოიხატებოდა.
ახლა ეს მიდგომა ნიშნავს თუ არა სწორედ ამ იმედგაცრუების, ნიჰილიზმის და მკვეთრად კრიტიკული განწყობის გამოხატულებას, სწორედ ასე იკითხება პროექტში ჩაწერილი ეს ცვლილება. შეიძლება ამას დავარქვათ ერთგვარად ან გაფრთხილება უკეთეს შემთხვევაში, უარეს შემთხვევაში კი, ერთგვარი სანქციაც. სწორედ ამგვარი ნაბიჯებით შეიძლება იყოს გამოხატული ის მკვეთრად კრიტიკული და ნეგატიური განწყობა, რომელიც სამწუხაროდ, ბოლო პერიოდის პოლიტიკურმა პროცესებმა ჩვენს პარტნიორს გაუჩინა“, – აცხადებს ბესელია.
ცნობისთვის, ამერიკის შეერთებული შტატების კონგრესში 2021 წლის საგარეო ოპერაციების დაფინანსების კანონია წარდგენილი, სადაც ნათქვამია, რომ საქართველო 2021 წელს დახმარების სახით არანაკლებ 132 025 000 აშშ დოლარს მიიღებს.
გაწერილია დახმარების წინაპირობაც. კონკრეტულად, ამ თანხის 15%-ის საქართველოსთვის გადაცემა შესაძლოა შეჩერდეს იქამდე, სანამ აშშ-ს სახელმწიფო მდივანი არ გადაწყვეტს, რომ საქართველოს მთავრობა შესაბამის ნაბიჯებს დგამს კორუფციასთან ბრძოლის, დემოკრატიული ინსტიტუტების გაძლიერების, კერძო სექტორში კანონის უზენაესობის და საერთაშორისოდ აღიარებული სტანდარტების დაცვის კუთხით.
ამასთან, პარლამენტის ვიცე-სპიკერი, კახა კუჭავა გავრცელებულ ინფორმაციას ტყუილს უწოდებს და ამბობს, რომ ეს არის კომიტეტის, ქვეკომიტეტში დაინცირებული კანონპროექტი.
