ხმაური და სიტყვიერი დაპირისპირება მოჰყვა მთავრობის ადმინისტრაციული შენობის მიმდებარე ტერიტორიაზე გაერთიანებული ოპოზიციის მიერ საარჩევნო ოქმების გამოფენის მცდელობას. ერთმანეთს სამართალდამცავები და ოპოზიციის ლიდერები დაუპირისპირდნენ.
„დღეს იმ ოქმების გამოფენა მოვაწყვეთ, რომელიც სხვათა შორის, ცესკოს საიტიდან ამოვბეჭდეთ. ჟვანია რომ იძახის, ტექნიკური შეცდომები იყო და გავასწორეთო, ამათ გასწორებაზე არც კი უფიქრიათ. შეგიძლიათ ნახოთ, ოქმებში რა ხდება. ნახავთ თითოეულ უბანში რამდენი დაკარგული ბიულეტენია, რამდენი ჩაყრილი ბიულეტენია და ა. შ. ამ ოქმების მიხედვითაც კარგად ჩანს, რომ ეს იყო ყველაფერი არჩევნების გარდა. აქ ზედმეტია საუბარი ტექნიკურ შეცდომებზე. როგორ შეიძლება უბანში 50-60 ბიულეტენი დაიკარგოს. თქვენ ფიქრობთ ქართული ოცნების დაიკარგა? ყველამ კარგად იცის, ვისი ბიულეტენებია დაკარგული.
კიდევ ერთხელ საილუსტრაციოდ მთავრობასთან გამოვფინეთ გაყალბებული ოქმები.
სრულიად გაუგებარი დაპირისპირება მოჰყვა ამას. პოლიცია დასაწყისში არ გვაძლევდა საშუალებას, საზოგადოებრივ სივრცეში ამ ტიპის აქცია-პერფორმანსი მოგვეწყო. ბოლოს არ ვიცი, ვიღაცებთან დარეკეს და მიხვდნენ, რომ, იდიოტიზმი იყო ოქმის გამოფენის საშუალების აკრძალვა. აქციები გაგრძელდება ხვალაც, თბილისის პარალელურად დიდი აქცია იქნება ზეგ ბათუმში 5 საათზე.
ყველას, ვინც ფიქრობს, რომ სამართლიანი არჩევნები არის მნიშვნელოვანი, ვეპატიჟებით აქ, აჭარის მთავრობასთან“, – განაცხადა „ერთიანი ნაციონალური მოძრაობის“ ერთ-ერთმა ლიდერმა გიორგი კირთაძემ.
შეგახსენებთ, ცესკოს თავმჯდომარის გადადგომისა და ხელახალი არჩევნების ჩატარების მოთხოვნით აჭარის მთავრობის სახლთან 8 ნოემბრიდან აქციები იმართება.
