„გამწვავებული ვითარება საოკუპაციო ზოლთან არის სწორედ თქვენი დამსახურება“,- ასე მიმართა ჯანმრთელობის დაცვისა და სოციალურ საკითხთა კომიტეტის სხდომაზე კომიტეტის თავმჯდომარემ დიმიტრი ხუნდაძემ „ევროპული საქართველოს“ წევრ, ზურაბ ჭიაბერაშვილს.

„რაც შეგვახსენეთ საოკუპაციო ზოლთან მომხდარი ფაქტი, რა თქმა უნდა, ეს ძალიან მძიმეა, მაგრამ ეპიდვითარებასთან ამას საერთო არ აქვს, თუმცა, საერთო აქვს თქვენს საქმიანობასთან. გამწვავებული ვითარება საოკუპაციო ზოლთან არის სწორედ თქვენი დამსახურება, მაგრამ მე არ მიყვარს ამაზე საუბარი“, -განაცხადა ხუნდაძემ.

მის ნათქვამს ზურაბ ჭიაბერაშვილიც გამოეხმაურა და თქვა, რომ დიმიტრი ხუნდაძე რუსული პროპაგანდის ენით საუბრობს.

„ანუ იქამდე მივედით ბატონო დიმიტრი, რომ ომი საქართველომ დაიწყო? ომი საქართველომ დაიწყო ეს თქვით ახლა თქვენ. ეს ისეთი საკითხია, რომლის გატარება არ შეიძლება. თქვენ ახლა თქვით, რომ ომი საქართველომ დაიწყო. მე წარმოვადგენ ხელისუფლებას, რომელიც მაშინ მართავდა ქვეყანას. თუ ჩვენი ბრალია, მაშინ ომი საქართველომ დაიყო, ეს არის თქვენი ლოგიკა, რომლითაც 8 წელია აზიანებთ ქვეყანას. თქვენ ახლა გაიმეორეთ ის, რასაც რუსული პროპაგანდა ამბობს ამდენი ხანია“, – განაცხადა ჭიაბერაშვილმა.