კლინიკა „იმედში“ ვაქცინაცია კვლავ გაგრძელდება, – ამის შესახებ ჯანდაცვის მინისტრმა, ეკატერინე ტიკარაძემ ბრიფინგზე განაცხადა.

მისივე თქმით, მსოფლიოს არც ერთ ქვეყანაში არ არის ვალდებულება, რომ ვაქცინაციის დროს ადგილზე  რეანიმატოლოგი იმყოფებოდეს.

„ჩვენ რამდენჯერმე განვმარტეთ, რომ ის სტრატეგიული დოკუმენტი, რომელიც ვაქცინაციასთან მიმართებით ჯგუფს აქვს შემუშავებული, წარდგენილი იყო მსოფლიო ჯანდაცვის ორგანიზაციის ექსპერტებთან, საერთაშორისო ექსპერტებთან და ასევე კოვაქსპლატფორმაზე და საქართველოსთვის ეს პროტოკოლი მათ მიერ იქნა მოწოდებული. რაც შეეხება „იმედის კლინიკას“, მას აქვს ექვსსაწოლიანი რეანიმაციული განყოფილება და ეს არ გახლავთ ისეთი სტაციონარი, სადაც ვაქცინაციის პროცესი არ შეიძლებოდა ყოფილიყო. იქ ვაქცინაციის პროცესი კვლავ გაგრძელდება“, – განაცხადა ეკატერინე ტიკარაძემ.

ცნობისთვის, 27 წლის ექთანს, რომელსაც ახალციხეში, კლინიკა „იმედში“ „ასტრაზენეკას“ ვაქცინის გაკეთების შემდეგ ანაფილაქსიური შოკი განუვითარდა, გარდაიცვალა.