„კლინიკების სიჭარბე არის არაეფექტურობის მთავარი ფაქტორი“,- ამის შესახებ ჯანდაცვის მინისტრის მოადგილემ, თამარ გაბუნიამ კლინიკების რაოდენობასთან დაკავშირებით განაცხადა.
ამით იგი ჯანდაცვის მინისტრის განცხადებას გამოეხმაურა, რომელმაც თქვა, რომ საქართველოს ამდენი კლინიკა არ სჭირდება.
„საქართველო ზოგადად ცნობილია მსოფლიო რუკაზე კლინიკების რაოდენობით. ეს იყო კრიტიკის მთავარი საგანი, სანამ კოვიდის ეპიდემია დაიწყებოდა, თუმცა კოვიდის პერიოდში ამან გარკვეულწილად დადებითი ფაქტორი იქონია, რადგან მალე მოხდა საწოლფონდის მობილიზება, თუმცა როდესაც ჯანდაცვის სისტემა დაუბრუნდება ნორმალურ საქმიანობას რა თქმა უნდა, კლინიკების სიჭარბე არის არაეფექტურობის მთავარი ფაქტორი. მიზანი არის ის, რომ ოპტიმალური იყოს კლინიკების რაოდენობა, რაც შესაბამისობაში იქნება მოსახლეობის საჭიროებებთან. თუ დღეს ქვეყანაში ფუნქციონირებს 17 ათასი საწოლი და იგი გაფანტულია 300-ზე მეტ კლინიკაში, მათმა კონსოლიდაციამ უკეთესი პირობები უნდა შექმნას ოპტიმალური სერვისის მიწოდებისთვის და დანახარჯი წავიდეს უკვე ბენეფიციარზე“,- განაცხადა თამარ გაბუნიამ.
