„ქართული ოცნების“ აღმასრულებელი მდივანი, ირაკლი კობახიძე ამბობს, რომ ოპოზიციური პარტიებიდან ზოგიერთ პოლიტიკოსს პარლამენტში შესვლის მზაობა აქვს. ამის შესახებ კობახიძემ გამართულ ბრიფინგზე განაცხადა.
„ოპტიმიზმის საფუძველი გვაქვს სხვადასხვა გარემოებებიდან გამომდინარე, მათ შორის საჯაროდაც ვლინდება, რომ პარლამენტში შესვლასთან დაკავშირებით კონკრეტულ პოლიტიკოსებს გარკვეული მზაობა აქვთ. ეს პროცესი გაღრმავდება. ჩვენ ვთქვით, რომ არის გარკვეული პროცესები ოპოზიციის შიგნით. სამწუხაროდ, ჯერ კიდევ ძლიერია სააკაშვილის გავლენა ოპოზიციონერ პოლიტიკოსებზე. ყველაფერი მიანიშნებს იმაზე, რომ სააკაშვილისგან კონკრეტული პარტიები და პოლიტიკოსები დამოუკიდებლობას მოიპოვებენ“,- განაცხადა ირაკლი კობახიძემ.
ცნობისთვის, ოპოზიცია 31 ოტქომბერს ჩატარებულ არჩევნებს გაყალბებულს უწოდებს და პარლამენტში შესვლას ბოიკოტს უცხადებს. ამასთან, ოპოზიცია ხელახალ არჩევნებს და ცენტრალური საარჩევნო კომისიის ადმინისტრაციის ცვლილებას ითხოვს.
