აქციები დისკომფორტს არანაირად არ მიქმნის. ჩვენი სამუშაო განრიგი არ შეცვლილა. ვმოძრაობ იმ მარშრუტით და მაქვს ის დღის წესრიგი, რომელიც აქამდე მქონდა, განსაკუთრებით ბოლო ორწელიწადნახევრის განმავლობაში, – ამის შესახებ აჭარის მთავრობის თავმჯდომარემ, თორნიკე რიჟვაძემ განაცხადა.
„მოქალაქეებს კიდევ ერთხელ მოვუწოდებ სიმშვიდისკენ. ეს არის ყველაზე მთავარი. ყველაფერი მიდის გეგმის შესაბამისად. ძალიან მალე შეიკრიბება აჭარის უმაღლესი საბჭო, დამტკიცდება მთავრობა და ჩვენ ჩვეულებრივად გავაგრძელებთ ხალხის სამსახურს და იმ გამოწვევებზე გამკლავებას, რომელიც ამ რეგიონის მოსახლეობას აწუხებს.
რას შეეხება კონკრეტულ პერფორმანსებს, როცა მიზანი არის დესტრუქცია, კონკრეტული პერფორმანსები, თვითონაც ასე ეძახიან, რა თქმა უნდა, ჩვენ ამაში არასდროს არ მივიღებთ მონაწილეობას. ამისთვის არც დრო გვაქვს, არც სურვილი… რაც შეეხება შეხვედრების მოთხოვნებს, როცა იქნება ამის წინაპირობა, როცა იქნება კონსტრუქციული ტონი და როცა შეიცვლება ტონი, ნებისმიერ დროს მზად ვარ შევხრვდე ყველაზე აგრესიულ პოლიტიკურ ოპონენტსაც კი.
რაც შეეხება პოლიციის ძალების მობილიზებას, პოლიცია თავისი შეფასებით , ახდენს იმ ძალის მობილიზებას, რაც მას სჭირდება საჯარო წესრიგის დასაცავად . თქვენ კარგად ხედავთ, როგორც აქ, მთავრობის შენობაში, ასევე გარეთ ჩვეულებრივად რა რესურსიც სჭირდება, იმ რესურსით გადავადგილდები და ამ მიმართულებით არაფერი არ შეცვლილა. ჩვენ გვაქვს ჩვენი პასუხისმგებლობა და ამ პასუხისმგებლობიდან გამომდინარე ვაკეთებთ ყველაფერს“, – განაცხადა რიჟვაძემ.
შეგახსნებთ, რომ აჭარის მთავრობის სახლთან ოპოზიციის წარმომადგენლები და მათი მხარდამჭერები აქციებს პერმანენტულად მართავენ.
