„მე და ალეკო ელისაშვილმა არ დავუჭირეთ მხარი ნიკა მელიას იმუნიტეტის მოხსნას, რადგან მიგვაჩნია, რომ არ არსებობს დამატებითი არგუმენტი, რის გამოც ეს გადაწყვეტილება უნდა მიგვეღო“,- ამის შესახებ „მოქალაქეების“ ერთ-ერთმა ლიდერმა, ლევან იოსელიანმა განაცხადა.
როგორც იოსელიანი ამბობს, გირაოს გადაუხდელობა არ არის არგუმენტი იმისთვის, რომ პოლიტიკოსს იმუნიტეტი მოუხსნა.
„მე ვუთხარი კიდეც „ქართული ოცნების“ დეპუტატებს, ჩათვალეთ, რომ ეს არის მისი პოლიტიკური პროტესტის ფორმა და გამოხატვის თავისუფლების ნაწილი-თქო. ამიტომ არ შეიძლება იმუნიტეტის მოხსნა-თქო. საბოლოო ჯამში, მათ გააკეთეს ის რაც გააკეთეს. ეს შენობა არ არის პროკურატურის გაგრძელება, პარლამენტი არის ინსტიტუცია, რომელმაც ზუსტად ასეთ შემთხვევეში უნდა გამოავლინოს თავისი დამოუკიდებლობა. სამწუხაროდ დღეს ეს პარლამენტმა ვერ შეძლო. ერთ რამეს ვხედავ, როგორც ,,ქართულ ოცნებას” არ ადარდებს როგორ იქნება ამ ქვეყანაში პოლიტიკური პროცესი და იქნება თუ არა სიმშვიდე და სტაბილურობა, ისე არ ადარდებს ეს „ნაციონალურ მოძრაობას“ და ერთი სული აქვთ როდის შეძლებენ პოლიტიკური ტემპერატურის აწევას ქუჩაში. ერთმანეთის თანატოლადი და თანაზომადი პოლიტიკური ძალაა და ამას ვუყურებთ მთელი დღე. ერთის მხრივ მთელი დღე პარლამენტში გვლანძღავს „ქართული ოცნება“, მეორეს მხრივ მელია გვლანძაღავს გარედან. ჩვენ ვართ ის ხალხი, ვინც დამოუკიდებლად იღებს გადაწყვეტილებას და ვაკეთებთ იმას რისიც გვჯერა და რაც სახელმწიფოებრივად სწორია“,- განაცხადა ლევან იოსელიანმა.
„ნაციონალური მოძრაობის“ თავმჯდომარეს, ნიკა მელიას პარლამენტმა იმუნიტეტი მოუხსნა. გადაწყვეტილებას პარლამენტში 88 დეპუტატმა დაუჭირა მხარი, წინააღმდეგი მხოლოდ 2 იყო.
პროკურატურამ პარალმენტს იმუნიტეტის შეწყვეტის თხოვნით მას შემდეგ მიმართა, რაც ნიკა მელიას გირაოს გადახდის ვადა ამოეწურა. მელია ამბობს, რომ იგი გირაოს არ გადაიხდის და არც სასამართლოში აპირებს მისვლას.
