ბათუმში, „ერთიანი ნაციონალური მოძრაობის“ ოფისში გაერთიანებულმა ოპოზიციამ ერთობლივი ბრიფინგი გამართა. როგორც ენმ-ის წარმომადგენლებმა ბრიფინგზე განაცხადეს, მხარდამჭერებთან და პარტნიორებთან გავლილი კონსულტაციის შედეგად მიიღეს გადაწყვეტილება და უარს აცხადებენ აჭარის უმაღლესი საბჭოს მანდატებზე. ასევე მეორე ტურში მონაწილეობას არ მიიღებს ენმ-ის დეპუტატობის კანდიდატი საქართველოს პარლამენტში ლევან ვარშალომიძე.

„31 ოქტომბრის არჩევნები ხელისუფლებამ გააყალბა და ეს საზოგადოებამ.საკუთარი თვალით ნახა.და დოკუმენტურადაც დასტურდება. ეს არ იყო არჩევნები, ეს იყო სპეცოპერაცია და ამას უმკაცრესი და უარყოფითი შეფასებები მიეცა საერთაშორისო,დამკვირვებლებისა და ანგარიშ გასაწევი არასამთავრობო ორგანიზაციების მხრიდან.

აჭარის უმაღლესი საბჭოს არჩევნებში მონაწილეობა მიიღო 180 302 მოქალაქემ. ამ ტოტალური გაყალბების ფონზე 97 ათასი 615 ხმა ოპოზიციამ მიიღო. თითქმის 15 ათასით მეტი, ვიდრე “ქართულმა ოცნებამ”. სახელისუფლებო პარტიამ კი ორჯერ მეტი მანდატი მიითვისა, ვიდრე ოპოზიციამ. დარღვეულია ამომრჩეველთა კონსტიტუციური უფლება. ჩვენ მხარდაჭრებთან და პარტნიორებთან ერთად მივიღეთ გადაწყვეტილება, უარს ვაცხადებთ აჭარის უმაღლესი საბჭოს იმ მანდატებზე, რაც გადმოგვცა ხელისუფლებამ. ხვალ აჭარის მთავრობის სახლთან 17:00 საათზე აქცია გაიმართება, ხმების დასაცავად და მოვუწოდებ მოსახლეობას, შემოგვიერთდნენ”, – განაცხადა ენმ-ის წევრმა ელგუჯა ბაგრატიონმა.

3 ნოემბერს 17 საათზე მთავრობის სახლთან აქცია დააანონსეს.

ავტორი: ნაირა ქობულაძე