„ნაციონალური მოძრაობის“ დეპუტატი რომან გოცირიძე ხელისუფლებას დისკრიმინაციაში ადანაშაულებს. როგორც გოცირიძემ „პრაიმტაიმნიუსთან“ საუბრისას განაცხადა, აჭარის მთავრობის ყოფილი მეთაური ლევან ვარშალომიძე “ქართულმა ოცნებამ” კარანტინში „გამოამწყვდია“, ხოლო „პატრიოტთა ალიანსის“ ის წევრები, რომლებიც აფხაზეთში იმყოფებოდნენ, პანდემიის პირობებში დაწესებულ რეგულაციებს არ დაექვემდებარნენ.
„სასტუმროში არის გამომწყვდეული ლევან ვარშალომიძე მაშინ, როდესაც საქართველოს სუსმა, მესაზღვრეებმა „პატრიოტთა ალიანსის“ ხალხი საოკუპაციო ზოლზე გაატარა, შემდეგ ისინი ჯერ აფხაზურმა სუსმა და მერე რუსულმა სუსმა მიიღო.
შემდეგ მათ ნახევარი დღე დაჰყვეს აფხაზეთში, გადმოლახეს ისევ საოკუპაციო ზოლი და გაგანია პანდემიის პირობებში, რომელიც აფხაზეთში მძვინვარებს, საქართველოს ხელისუფლებამ კარანტინშიც არ მოათავსა.
„ქართული ოცნება“ ვითომ აკრიტიკებს „პატრიოტთა ალიანსს“. ირაკლი კობახიძემ გააკრიტიკა ყველაზე მწარედ “პატრიოტთა ალიანსი” – „პატრიოტებს“ უწოდა შმატრიოტები. ერთიც და მეორეც „ქართული ოცნებაა“,- განაცხადა გოცირიძემ.
ინფორმაციისთვის, გუშინ საქართველოში უკრაინიდან ჩამოვიდა აჭარის მთავრობის ყოფილი მეთაური, უკრაინის საინვესტიციო ოფისის თავმჯდომარე ლევან ვარშალომიძე, ის აჭარაში „ნაცმოძრაობის“ მაჟორიტარობის კანდიდატი იქნება.
“პატრიოტთა ალიანსის” წევრები ირმა ინაშვილი და გიორგი ლომია აფხაზეთში რამდენიმე დღის წინ იმყოფებოდნენ. საოკუპაციო ხაზის გადმოკვეთის შემდეგ, პოლიტიკოსებს სავალდებულო კარანტინი არ გაუვლიათ.
