ჩვენ ყოველდღიურად ვუყურებთ რა ხდება საქართველოში და ვაორგანიზებთ საპარლამენტო დელეგაციას, სავარაუდოდ, ხვალ ჩამოვფრინდებით, შევხვდებით ოპოზიციის ყველა ლიდერს, იმედი მაქვს ნიკა მელია თავისუფალი დაგვხვდება და ასევე, შევეცდებით შევხვდეთ მთავრობას, – ამის შესახებ ლიეტუვის სეიმის წევრმა სიგიზმუნდ პავილიონისმა „მთავარ არხთან“ საუბრისას განაცხადა.
„ვესაუბრე მთავრობის წევრებს და უკვე ვუთხარი, რომ ძალიან დიდი შეცდომა იქნება ამ გზით სიარული. დასავლეთში, ევროპაში ჩვენ არ ვაპატიმრებთ ოპოზიციონერ ლიდერებს, მე ეს ყველაფერი ნავალნისა და პუტინის ისტორიას მაგონებს, მე მგონია, რომ ნატოსა და ევროკავშირის წევრობის კანდიდატი ქვეყნისთვის ეს თვითმკვლელობა იქნება, თქვენი ევროპული მომავლისთვის ჩვენ ვიბრძვით და არ მგონია, ბევრი ასეთი მეგობარი გყავდეთ, ახლა მოდის ბაიდენის ადმინისტრაცია, რომელთანაც მე შეერთებული შტატების ელჩობის დროს დიდხანს ვმუშაობდი, ვიცი ეს ხალხი, მათთვის მთავარია დემოკრატია, ადამიანის უფლებები და ღირსება. თუკი ეს მთავრობა მართლაც ფიქრობს ევროკავშირის წევრობაზე და ჩვენ გვაქვს სიგნალები, ეს შეიძლება ნატოს შემთხვევაში უფრო ადრეც მოხდეს, ამიტომ არც კი იფიქროთ ასეთი ნაბიჯების გადადგმაზე, რუსეთი მუდმივად ცდილობდა ჩვენს დაყოფას, ახლაც რუსეთი ცდილობს თქვენს პროვოცირებას, მაგრამ იყავით ჭკვიანები, მე ჩამოვალ თბილისში, ლიტვის საგარეო საქმეთა მინისტრი და ჩემი პრეზიდენტიც შეიძლება ჩამოვიდეს, ერთადერთი მესიჯი, დასხედით მოლაპარაკებების მაგიდასთან, იპოვეთ კომპრომისი, გაერთიანდით და იარეთ დასავლეთისკენ, ახალი არჩევნები შეიძლება იყოს ერთადერთი გამოსავალი, მაგრამ ამაზე ყველა მხარე უნდა შეთანხმდეს, უნდა შეთანხმდეთ ყველა და რა პირობებით”, – განაცხადა სიგიზმუნდ პავილიონისმა.
დღეს, 18 თებერვალს, პრემიერმინისტრი გიორგი გახარია, თანამდებობიდან გადადგა.
გიორგი გახარიამ ეს გადაწყვეტილება ნიკა მელიას საქმეს დაუკავშირდა.
მისი თქმით, ურყევი პოზიციაა, რომ “ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ეკალაციის შესაძლებლობას, არის მიუღებელი”.
გახარიას გადადგომასთან დაკავშირებით, შინაგან საქმეთა სამინისტრომ ნიკანორ მელიას საქმეზე დაგეგმილი ღონისძიება დროებით გადადო.
