საფრანგეთში, ლუვრის წინ გიდებმა აქცია გამართეს. ისინი პირბადეებს ატარებდნენ და ხელში მონა ლიზას სურათები ეკავათ.
გიდები ქვეყნის ხელისუფლებას ტურიზმის ინდუსტრიაში დასაქმებული ადამიანების დასახმარებლად არასაკმარისი ღონისძიებების განხორციელებაში ადანაშაულებდნენ.
შეგახსენებთ, რომ კორონავირუსის პანდემიის გამო თითქმის 4 თვის განმავლობაში დახურული მსოფლიოში ერთ-ერთი ყველაზე ცნობილი მუზეუმი – ლუვრი ვიზიტორებისთვის დღეს გაიხსნა.
კორონავირუსის პრევენციის მიზნით, მუზეუმში გარკვეული შეზღუდვები მოქმედებს. კერძოდ, აუცილებელია პირბადის ტარება. ასევე, ვიზიტორთა რიცხვი ლიმიტირებულია.
ის გალერიები, სადაც სოციალური დისტანციის დაცვა რთულია, კვლავ დახურული იქნება.
მუზეუმს ყოველწლიურად 10 მილიონი ვიზიტორი სტუმრობს, რომელთა უმრავლესობა საფრანგეთში სხვადასხვა ქვეყნიდან ჩადის.
