ეს არის გამოსავლის ძებნის მცდელობა შექმნილი პოლიტიკური კრიზისიდან და არა რეალურად შეთავაზება, – ასე უპასუხა “ნაციონალური მოძრაობის” ერთ-ერთმა ლიდერმა, ზაალ უდუმაშვილმა „ქართული ოცნების“ აღმასრულებელი მდივნის, ირაკლი კობახიძის შეთავაზებას დებატების შესახებ.
უდუმაშვილის თქმით, პარტიაში ამ თემაზე მსჯელობენ და ოფიციალური პოზიცია მალე გახდება ცნობილი.
“ახლა გაახსენდათ დებატები, როდესაც უმწვავეს კრიზისში შევიდნენ. ეს არის გამოსავლის ძებნის მცდელობა შექმნილი პოლიტიკური კრიზისიდან და არა რეალურად შეთავაზება ოპოზიციისთვის. ასე რომ ამაზე ჩვენ ოფიციალურ პასუხს განვაცხადებთ. დებატებში კი არ არის პრობლემა, არამედ პრობლემა არის ის, რისთვის იყენებს ხელისუფლება ამ დებატებს, რა სურს რომ ამით გვითხრას. ასე რომ ჩვენი პოზიცია დღეს გახდება ცნობილი”, – განაცხადა უდუმაშვილმა რუსთავი 2-ის ეთერში.
ცნობისთვის, ირაკლი კობახიძემ ოპოზიციას დებატები შესთავაზა. განსახილველი თემები კი საარჩევნო დარღვევები, ხარვეზები და მანიპულაცია იქნება.
