9 მილიონი ლარის გაფლანგვის საქმეზე საქალაქო სასამართლოში პროცესი მიმდინარეობს. როგორც მსჯავრდებული ექსპრეზიდენტის დედა გიული ალასანია ამბობს, მას სასამართლოს სამართლიანობის იმედი არ აქვს, თუმცა ამბობს, რომ მიხეილ სააკაშვილის დღევანდელი გამოსვლა საინტერესო იქნება და ექსპრეზიდენტი ყველაფერზე გაამახვილებს ყურადღებას.
“მოლოდინი, დიდი ილუზია, როცა საქმე გვაქვს ამ უსამართლო სასამართლოსთან, არა მაქვს მართალი გითხრათ, მაგრამ მაქვს მოლოდინი, რომ იქნება საინტერესო ჩემი შვილის გამოსვლა. ყველაფერზე გაამახვილებს ყურადღებას ალბათ, რაც ეხება ამ კომიკურ საქმეს.
ადამიანი, რომელსაც დღე და ღამე არ ეძინა და რაღაც სასწაულებს აკეთებდა, მანცვიფრებდა თუ როგორ შეიძლებოდა იმ არაფრისგან, ჭაობში მყოფი ქვეყნისგან ასეთი ცნობილი ქვეყნის შექმნა, რომელზედაც მთელი მსოფლიო ალაპარაკდა და საბოლოოდ მივიღეთ აი ეს,” – განაცხადა გიული ალასანიამ.
