„ნაციონალური ძალები“ უკვე ცდილობენ იმ სცენარის განხორციელებას, რომელიც აქვთ გამზადებული და ამის აღსრულება, რა თქმა უნდა, არ შეუძლიათ, – ამის შესახებ მმართველი გუნდის ერთ-ერთი ლიდერი, თეა წულუკიანი აცხადებს.
„ჩვენ ვხედავთ ფეიკ-ტელევიზიებით და ჟურნალიზმით ფეიკ-პარტიებს და ფეიკ კვლევებს, ეს ის ხალხია, ვინც დიდი უბედურება, რაც ჩვენს ქვეყანას 2008 წლის აგვისტოს ომის სახით დაატყდა თავს, იზეიმეს, ეს ის ხალხია, ვინც საკუთარ მარცხს გამარჯვებად ასაღებს და დღეს საღამოსაც აქვთ უბადრუკი მცდელობა იმისა, რომ თავიანთ ამომრჩეველში გააჩინონ მუხტი და ჩართონ ის სცენარი, რომლის ჩართვის პროცესშიც სირთულეებს აწყდებიან.
ვხედავთ, რომ ჩვენი მომხრეების ძალიან დიდი რაოდენობა მივიდა საარჩევნო უბანთან და მინდა მადლობა ვუთხრა ყველა იმ „ქართული ოცნების“ მხარდამჭერს, რომელმაც თავისი არჩევანი გააკეთა და კვლავაც აკეთებს, სწორედ იმისთვის, რომ ზემოთხსენებული რადიკალური ძალები არც კი შეეცადონ და ქვეყანას და მის მომავალს არეულობების მცდელობები არ დაუპირისპირონ.
ჩვენი გუნდის სახელით მივმართავ საერთაშორისო დამკვირვებლებსა და ყველა საელჩოს, ჩვენ ყველამ ერთად ვნახეთ რადიკალური დესტრუქციული ოპოზიცია მიმართავს ძალადობრივ მეთოდებს, საარჩევნო უბნებზე იარაღით დაიარებიან და ცდილობენ ამომრჩეველი დააშინონ, ეს არის მიუღებელი და ყველამ ერთად უნდა დავგმოთ“, – განაცხადა წულუკიანმა.
დღეს, 31 ოქტომბერს საქართველოში საპარლამენტო არჩევნები მიმდინარეობს. ამომრჩეველთა ერთიან სიაში სულ 3 205 634 ამომრჩეველია რეგისტრირებული. ქვეყნის მასშტაბით გახსნილია 3 657 საარჩევნო უბანი. იმ ამომრჩევლებისთვის, რომლებიც იმყოფებიან სამკურნალო დაწესებულებებში, კარანტინსა და თვითიზოლაციაში, ცალკე დამატებით შეიქმნა 127 სპეციალური საარჩევნო უბანი.
არჩევნებში 48 პოლიტიკური პარტია და ორი საარჩევნო ბლოკი მონაწილეობს.
ყველა ინფორმაცია საპარლამენტო არჩევნებთან დაკავშირებით ნახეთ ამ ბმულზე
