აჭარაში 1-ლი თებერვლიდან სასწავლო პროცესის საკლასო ოთახებში განახლების მიუხედავად, მოსწავლეთა ნაწილი სკოლებში არ გამოცხადდა.

როგორც მშობლების ნაწილი აცხადებს, არ აპირებენ შვილების სკოლებში გაგზავნას, რადგან თვლიან, რომ სასწავლო დაწესებულებებში ვერ მოხერხდება ჯანდაცვის მიერ გაცემული რეგულაციების დაცვა და კვლავ სწავლების დისტანციურ მეთოდს ითხოვენ.

„არ გავუშვი ჩემი შვილები სკოლაში, სამი თაობა ვცხოვრობთ ერთ ოჯახში, მოხუცი მშობლები და ბებია-ბაბუა მყავს. რა გარანტია მაქვს, რომ ჩემს შვილებს სკოლაში კორონავირუსი არ დაემართებათ? მაქსიმალურად იზოლაციაში ვართ მთელი ეს პერიოდი და როგორღაც გადავრჩით. ვერ გავრისკავ. იყოს კვლავ ონლაინსწავლება რაღაც პერიოდი, სანამ მდგომარეობა ბოლომდე არ მოწესრიგდება და ვაქცინაცია არ ჩატარდება. ბევრი მშობელი ასევე ფიქრობს. ვთხოვეთ დამრიგებელს და დირექციას, გვიშუამდგომლონ განათლების სამინისტროსთან, რომ დატოვონ დისტანციური სწავლება“, – აცხადებს ნინო მალაყმაძე.

აჭარის განათლების სამინისტროს ინფორმაციით, საჯარო სკოლებში 12:00 საათის მდგომარეობით მოსწავლეთა გამოცხადების ყველაზე დაბალი მაჩვენებელი ბათუმში დაფიქსირდა, ხოლო ყველაზე მაღალი – ხულოში.

სტატისტიკა (I ცვლა) კი ასეთია:

ბათუმი -73.5%;

ხელვაჩაური-81%;

ქობულეთი-85 %;

შუახევი-93%;

ქედა-91%;

ხულო- 95%.

„დღეიდან აჭარაში სასწავლო პროცესი საკლასო ოთახებში ჯანდაცვის რეკომენდაციებისა და უსაფრთხოების ნორმების სრული დაცვით განახლდა. ყველა სკოლა უზრუნველყოფილია შესაბამისი რესურსით, იმისთვის, რომ სასწავლი პროცესი უსაფრთხო გარემოში წარიმართოს”, – აცხადებენ აჭარის განათლების სამინისტროში.

შეგახსენებთ, აჭარაში მხოლოდ ერთ სკოლაში, შუახევის მუნიციპალიტეტის სოფელ ცინარეთში არ განახლდა სწავლა საკლასო ოთახებში. აღნიშნული სკოლის სამ მასწავლებელს კორონავირუსი დაუდასტურდა.

ავტორი: ნაირა ქობულაძე