მოვუწოდებ ყველა იმ პარტიას, რომელიც დღემდე თავს იკავებს, მანდატი მიიღონ და ჩაერთონ საარჩევნო ჯგუფის მუშაობაში, – ამის შესახებ პარლამენტის განათლების, მეცნიერებისა და კულტურის კომიტეტის თავმჯდომარის პირველმა მოადგილემ, შალვა პაპუაშვილმა განაცხადა.
„იცით, რომ შემჭიდროებული ვადები გვაქვს. გვინდა, 1-ლი მარტისთვის წარვადგინოთ პროექტი. ამ ფორმატში ჩართულია საპარლამენტო ოპოზიცია და ამიტომ, ყველა იმ პარტიას, რომელიც დღემდე თავს იკავებს მანდატის მიღებაზე მოვუწოდებ, მანდატი მიიღონ და ჩაერთონ სამუშაო ჯგუფის მუშაობაში. თუ რამე შენიშვნა აქვთ, არჩევნების ხარისხთან დაკავშირებით, ეს არის ერთადერთი შესაძლებლობა იმისთვის, რომ გამოხატონ, მათ ეს პრეტენზიები და მონაწილეობა მიიღონ ამ შესაძლო ხარვეზების გამოსწორებაში“, – განაცხადა შალვა პაპუაშვილმა.
ცნობისთვის, ამ წუთებში საარჩევნო რეფორმასთან დაკავშირებული სამუშაო ჯგუფი პირველ შეხვედრას მართავს. ჯგუფი საარჩევნო რეფორმის მოსამზადებლად იმუშავებს.
