„სტრატეგია აღმაშენებლის“ ლიდერი გიორგი ვაშაძე აცხადებს, რომ ოპოზიციასა და ხელისუფლებას შორის მიღწეული შეთანხმება საქართველოს გამარჯვებაა.
მისი თქმით, შეთანხმების შემდეგ აუცილებლად განხორციელდება კონკრეტული ცვლილებები და მიიღებენ კანონებს, რომელიც დოკუმენტითაა გათვალისწინებული.
„მოვუწოდებ ყველა პოლიტიკურ ძალას, მოდით ამ საერთო გამარჯვებაში გავერთიანდეთ და ჩავითვალოთ ეს გამარჯვება, როგორც საქართველოს სახელმწიფოებრიობის, ევროპული კურსის, ევროატლანტიკური ინტეგრაციის და რაც მთავარია, ქართველი ხალხის გამარჯვებად. ვფიქრობ, ამის სრული რესურსი გვაქვს. ძალიან მყარი ვარ ჩემს პოზიციებში და ამ გამარჯვებას, რომელიც მოვიპოვეთ, ჩავაბეტონებთ კონკრეტული ცვლილებებით, კანონით. ამას უკან ვერ წაიღებს ვერც „ქართული ოცნება“ და ვერც ერთი ის ადამიანი, ვინც ხელს აწერს დოკუმენტს. რაც შეეხება სხვა პარტიებს, როგორც კი ამნისტიის კანონი იქნება მიღებული და ნიკა მელია თავისუფალი იქნება, ისინიც შემოვლენ პარლამენტში და გააგრძელებენ საპარლამენტო საქმიანობას. ამით ყველა კითხვაზე პასუხი გაცემულია“, – განაცხადა ვაშაძემ.
შეგახსენებთ, რომ შარლ მიშელის მიერ წარდგენილ დოკუმენტს – „საქართველოს წინსვლის გზა“ პარტიებმა ხელი ოფიციალურად 19 აპრილს მოაწერეს.
პოლიტიკურმა ძალებმა 5-პუნქტიანი შეთანხმების აღსრულებაზე ერთად უნდა იმუშაონ.
