ძალიან ბევრს აქამდეც უნდოდა პარლამენტში შევარდნა, მაგრამ იმდენი ჭკუა ეყო, რომ რაღაც ტიპის მეტნაკლები ერთობა თუ არ იქნებოდა, გადაწყვეტილება არ მიეღოთ, – ამის შესახებ „პალიტრანიუსის“ ეთერში „ერთიანი საქართველოს“ ლიდერმა, ნინო ბურჯანაძემ განაცხადა.
მისივე თქმით, მყარად რომ ყოფილიყვნენ, ევროპელი კოლეგები უკეთეს დოკუმენტს დადებდნენ.
„მოლაპარაკებებს სჭირდება გამოცდილება. მე არ ვამბობ, რომ, ვინც ამ პროცესში იყო ჩართული გაიყიდნენ და ან პირადი ინტერესით იყვნენ წარმოდგენილები, თუმცა, ასეთებიც იყვნენ და ჩვენ მალე ვიხილავთ მათ პარლამენტის სავარძლებიდან ევროპულ სტრუქტურებში გადაბარგებულებს. საკუთარი სამსახურისთვის და თანამდებობის ძებნით დაკავებულებიც იყვნენ მათ შორის, ვინც მოლაპარაკებებში მონაწილეობდა. მაგრამ არიან ადამიანები, რომლებიც მართლა ფიქრობენ, რომ სხვა გამოსავალი არ იყო, გამოცდილების ნაკლებობის გამო. ამიტომ მოიკლეს თავი, რომ მე არ ვყოფილიყავი მოლაპარაკებების მაგიდასთან. მე არ დავთანხმდებოდი იმას, რაზეც ახლა ხელი მოეწერა იმიტომ, რომ დარწმუნებული ვარ, ჩვენ რომ მყარად ვყოფილიყავით, ევროპელი კოლეგები უკეთეს დოკუმენტს დადებდნენ. მათ შორის არ იქნებოდა მიბმა ადგილობრივ არჩევნებთან და იქნებოდა როგორც მინიმუმ პლებისციტი. ძალიან ბევრს აქამდეც უნდოდა პარლამენტში შევარდნა, მაგრამ იმდენი ჭკუა ეყო, რომ რაღაც ტიპის მეტნაკლები ერთობა თუ არ იქნებოდა, გადაწყვეტილება არ მიეღოთ, “- განაცხადა ნინო ბურჯანაძემ.
