ფინანსთა მინისტრის, ივანე მაჭავარიანის განცხადებით, მსოფლიო ბანკმა მზადყოფნა გამოთქვა ვაქცინის შეძენასა და ასევე, ლოჯისტიკურ საკითხებში საქართველოს დაეხმაროს, ივანე მაჭავარიანმა პრემიერ-მინისტრის, გიორგი გახარიასა და ევროპისა და ცენტრალური აზიის რეგიონში, მსოფლიო ბანკის ვიცე-პრეზიდენტის, ანა ბიერდემის შორის გამართული შეხვედრის შემდეგ განაცხადა.
„შეხვედრაზე საუბარი იყო დაფინანსების უზრუნველყოფაზე და „მსოფლიო ბანკმა“ მზადყოფნა გამოთქვა ვაქცინის შეძენასა და ასევე, ლოჯისტიკურ საკითხებში დაგვეხმაროს, ამ კუთხით პრობლემა არ გვექნება. ასევე ყოველთვის მნიშვნელოვანი იყო „მსოფლიო ბანკის“ მონაწილეობა სტრუქტურულ რეფორმებში. მათ აღგვითქვეს, რომ ამას კიდევ გააგრძელებენ“, – განაცხადა ივანე მაჭავარიანმა.
საქართველოს პრემიერ-მინისტრმა გიორგი გახარიამ, მსოფლიო ბანკის ვიცე-პრეზიდენტმა ევროპისა და ცენტრალური აზიის რეგიონში ანა ბიერდემ შეხვედრაზე, რომელიც ვიდეოკონფერენციის ფორმატში გაიმართა, საქართველოსა და მსოფლიო ბანკის პარტნიორობის სტრატეგია და კონკრეტული პრიორიტეტები, მათ შორის, მსოფლიო ბანკის მხრიდან საქართველოს ვაქცინაციის ეროვნული გეგმის მხარდაჭერის შესაძლო მიმართულებები განიხილეს.
