ქობულეთის საკრებულოს „ნაციონალური მოძრაობის“ წევრის, ლელა ვერულიძის განცხადებით, ქობულეთის მერი და ქობულეთი კორუფციაში და ნეპოტიზმშია ჩაფლული. მისი თქმით, ქობულეთის მერმა ბიძაშვილური კლანი შემქნა და უკანონო საქმიანობებს აწარმოებს.
„ქობულეთის მუნიციპალიტეტი და მერი მირიან ქათამაძე ნეპოტიზმსა და კორუპციაშია ჩაფლული. მას ბიძაშვილების კლანით აქვს დაკომპლექტებული მთელი მერია და არამარტო მერია.
მაგალითად, ასლან ქათამაძე, რომელიც არქიტექტურის სამსახურის უფროსია საკმაოდ ხმაურიანი არაკანონიერ საქმეებშია მხილებული.
ასლან ქათამაძის და არის ასევე მირიან ქათამაძის მშობლიური სოფლის ზენითის დეპუტატი, ასევე მათი ბიძაშვილი იმედა ქათამაძე არის ზედამხედველობის სამსახურის მთავარი სპეციალისტი“, – განაცხადა ვერულიძემ.
ლელა ვერულიძეს თქმით, მირიან ქათამაძე და მისი „კლანი“ მართავს ყველა იმ უკანონო საქმიანობას, რომელიც დღეს ქობულეთის მუნიციპალიტეტში მიმდინარეობს.
„მირიან ქათამაძეს მივმართავთ და ვეუბნებით, მხოლოდ თქვენი ბიძაშვილებისთვის არ არსებობს თანამდებობები. თქვენ ხართ მხოლოდ „ქართული ოცნების“ მერი“, – განაცხადა ვერულიძემ.
ქობულეთის მერი, მირიან ქათამაძე, „ნაციონალური მოძრაობის“ წევრის განცხადებას აბსურდულს უწოდებს.
„ეს განცხადება არის აბსურდული და რეალობას მოკლებული. ეს არის „ნაციონალური მოძრაობის“ მორიგი ცრუ ბრალდება. არაერთხელ გაკეთდა კომენტარი ამ საკითხზე და კიდევ ერთხელ განვმარტავ, ასლან ქათამაძე მუნიციპლიტეტის მერიაში მუშაობს 2014 წლიდან.
ქეთინო ქათამაძე 2017 წლიდან არის საკრებულოს დეპუტატი და მის არჩევაში მე, როგორც მერს ვერ მექნებოდა წვლილი შეტანილი, რადგან იგი ზენითის მაჟორიტარი დეპუტატობის კანდიდატად წარადგინა პარტიამ.
რაც შეეხება იმედო ქათამაძეს, იგი 2015 წლიდან მუშაობს მერიის ზედამხედველობის სამსახურში, სპეციალისტის თანამდებობაზე“, – უთხრა „პრაიმტაიმს“ ქობულეთის მერმა.
ავტორი: ნაირა ქობულაძე
