„ნაციონალური მოძრაობის“ წევრის, ხატია დეკანოიძის განცხადებით, „ლელოს“ წინადადება ნიკა მელიასთან დაკავშირებით, მათთვის მისაღებია.
მისი თქმით, პარტიისთვის და თავად ნიკა მელიასთვის გირაო და ამნისტია კატეგორიულად მიუღებელია.
“უკეთესი წინადადებაა, რადგან გირაო ჩვენთვის კატეგორიულად მიუღებელია, მიუღებელია ამნისტია, მაგრამ ყველაზე მნიშვნელოვანი, რაც “ნაციონალური მოძრაობისთვის” ყოველთვის იყო, არის ის, რომ ნიკა უნდა განთავისუფლდეს უპირობოდ. ნიკასთვის მიუღებელია ნებისმიერი სახის გირაო,”- აცხადებს ხატია დეკანოიძე.
ცნობისთვის, „ლელოს“ ინფორმაციით, პარტიის ლიდერებმა ევროპარლამენტარებს შესთავაზეს, ევროპელი პარლამენტარები თავდებში დაუდგნენ ნიკა მელიას, რათა დაუყოვნებლივ შეიცვალოს მისი აღკვეთის ღონისძიება და მელია გათავისუფლდეს. მათი განმარტებით, ევროპელი პარლამენტარები მზად არიან, ჩაერთონ ამ ინიციატივაში და თავდებში დაუდგნენ ნიკა მელიას.
