“შეგიძლიათ, დაასახელოთ საკითხი, რომელზეც “ნაციონალური მოძრაობა” არ აცხადებს ბოიკოტს? მგონი, საკუთარ თავს გამოუცხადებენ მალე ბოიკოტს”, – ამის შესახებ ჟურნალისტებთან იურიდიულ საკითხთა კომიტეტის თავმჯდომარე ანრი ოხანაშვილმა განაცხადა.
“დღეს ოპოზიციის ყველა წარმომადგენელს, საპარლამენტო უმრავლესობას ექნება შესაძლებლობა, გაესაუბრონ წარმოდგენილ კანდიდატებს. იქნება შეკითხვები კომპეტენციასთან დაკავშირებით, ასევე საკითხებზე, რომელიც უკავშირდება შესაბამისი მოსამართლის ბიოგრაფიას და ეს პროცესი არის მაქსიმალურად გამჭვირვალე, რომელშიც მონაწილეობენ არასაპარლამენტო სუბიექტები, სახალხო დამცველის წარმომადგენლები, ადვოკატთა ასოციაციის, იურიდიული დახმარების სამსახურის ხელმძღვანელი და აკადემიური სფეროს წარმომადგენლები, ასევე, არასამთავრობო ორგანიზაციებს ექნებათ შესაძლებლობა დასვან შეკითხვები.
ეს პროცესი არის უპრეცენდენტო, საქართველოს ისტორიაში უზენაესი სასამართლოს მოსამართლეთა არჩევის ასეთი გამჭვირვალე ფორმა არ არსებობდა 2019 წლამდე და ჩვენ შევძელით მიგვეღწია ასეთი გამჭვირვალე პროცესის წარმართვისთვის. მას შემდეგ, რაც დავასრულებთ მოსმენებს, გადავწყვეტთ გუნდი, როდის იქნება მიზანშეწონილი კენჭისყრების ჩატარება”, – განაცხადა ოხანაშვილმა.
უზენაესი სასამართლოს მოსამართლეების დანიშვნის პროცესს ოპოზიციის ნაწილი ბოიკოტს უცხადებს.
