რუსი ოპოზიციონერი პოლიტიკოსის, ალექსეი ნავალნის თანაგუნდელები აცხადებენ, რომ ის ციმბირის ქალაქ ტომსკის სასტუმროს ოთახში მოწამლეს და არა აეროპორტში.
მათი ცნობით, ქიმიური ნივთიერების კვალი ქალაქ ტომსკში მდებარე სასტუმროში, მის ოთახში ნაპოვნ წყლის ცარიელ ბოთლზე აღმოაჩინეს
როგორც სოციალურ ქსელ Instagram-ზე გავრცელებულ განცხადებაშია ნათქვამი, როგორც კი ნავალნის თანაგუნდელებმა ოპოზიციონერის ცუდად ყოფნის შესახებ შეიტყვეს, მის ნომერში მივიდნენ ადვოკატთან ერთად და ყველა ის ნივთი შეფუთეს, რომელთანაც პოლიტიკოსს შესაძლოა, შეხება ჰქონოდა, რათა შემდგომ გერმანული მხარისთვის გადაეცათ.
სოციალურ ქსელში გამოქვეყნებულია ნავალნის სასტუმროს ოთახში გადაღებული ვიდეოც.
შეგახსენებთ, რომ 20 აგვისტოს ქალაქ ტომსკიდან მოსკოვში თვითმფრინავით მგზავრობისას, ალექსეი ნავალნი ცუდად გახდა, რის გამოც თვითმფრინავი ავარიულად, ომსკში დაეშვა, სადაც ნავალნი მოწამვლის სიმპტომებით რეანიმაციაში მოათავსეს.
22 აგვისტოს ალექსეი ნავალნი სამკურნალოდ გერმანიაში გადაიყვანეს.
2 სექტემბერს გერმანიის მთავრობამ ოფიციალური განცხადება გამოაქვეყნა და დაადასტურა, რომ ალექსეი ნავალნი „ნოვიჩოკის“ ნერვული აგენტითაა მოწამლული.