2011 წლის 26 მაისი იყო ბევრი თვალსაზრისით ძალიან მძიმე დღე საქართველოსთვის, – ამის შესახებ „ნაციონალური მოძრაობის” თავმჯდომარემ ნიკა მელიამ განაცხადა.
„რა თქმა უნდა, 2011 წლის 26 მაისი იყო ბევრი თვალსაზრისით ძალიან მძიმე დღე საქართველოსთვის, სახელმწიფოსთვის, სადაც ხელისუფლებამ გადაამეტა ძალას და ამას ახლა არც ერთი ჭკუათმყოფელი ადამიანი არ უნდა უარყოფდეს. მიუხედავად იმისა, მაშინდელი ოპოზიცია აპირებდა 26 მაისის აღლუმის ჩატარების ხელშეშლას თუ არა, გამართლება იმას, რაც მოხდა, არ აქვს, არ ჰქონდა და არ ექნება“, – განაცხადა ნიკა მელიამ.
ცნობისთვის, 2011 წლის მაისში საქართველოს ოპოზიციური პოლიტიკური პარტიების მიერ ორგანიზებული, საპროტესტო გამოსვლები თბილისსა და ბათუმში, საქართველოს პრეზიდენტის მიხეილ სააკაშვილის გადადგომის მოთხოვნით იმართებოდა. აქციებს ძირითადად მიტინგის სახე ჰქონდათ და მიმდინარეობდა 21 მაისიდან 26 მაისის ჩათვლით, თბილისში სამართალდამცავი ორგანოების მხრიდან მის დარბევამდე. 26 მაისის აქციის დაშლისას დაიღუპა 2 ადამიანი.
