„ძალიან მარტივი მოცემულობაა და ვფიქრობ „ქართულმა ოცნებამ“ უნდა გაბედოს და გააკეთოს ის, რაც უნდა გააკეთოს“,- „ნაციონალური მოძრაობის“ თავმჯდომარე ნიკა მელია მმართველ პარტიას მოუწოდებს ოპოზიციონერ დეპუტატებს უფლებამოსილება დროულად შეუწყვიტონ.
როგორც ნიკა მელია ამბობს, პარლამენტმა რეგლამენტით უნდა იხელმძღვანელოს.
„ოპოზიციამ უარი თქვა მასკარადში მონაწილეობაზე. შესაბამისად, მოპარული, გაყალბებული არჩევნების გაფორმება ჩვენი მონაწილეობით არ მოხდება. მმართველმა პარტიამ უნდა იხელმძღვანელოს რეგლამენტით, რომელიც უკვე დარღვეულია და თითოეულ ჩვენგანს უნდა შეუწყდეს უფლებამოსილება. ამაზე ცხადად როგორ ვუთხრათ ხელისუფლებას, რომ არ ვიღებთ მონაწილეობას იქ, სადაც უამრავი დანაშაული ჩაიდინეს. რას გააკეთებს ამის შემდეგ ოპოზიცია საზოგადოებასთან ერთად, დაინახავს ყველა, მათ შორის “ქართული ოცნებაც”, – განაცხადა ნიკა მელიამ.
ცნობისთვის, პარლამენტმა ოპოზიციონერებისთვის უფლებამოსილების შეწყვეტაზე 2 თებერვალს უნდა იმსჯელოს.
