“ერთიანი ნაციონალური მოძრაობის” თავმჯდომარის, ნიკა მელიას სასამართლო პროცესი გადაიდო.
როგორც ნიკა მელიას ადვოკატმა გიორგი კონდახიშვილმა სასამართლო პროცესზე განაცხადა, პროკურატურამ დაარღვია შეთანხმება, რადგან მან დასაკითხი მოწმეთა შესახებ ადვოკატების წინასწარ ინფორმირება არ მოახდინა.
“ბატონო მოსამართლე, გიდასტურებთ პატივისცემას, მაგრამ დღევანდელ პროცესზე ბრალდებულის დაცვას ვერ გავაგრძელებ, ვიდრე ნიკა მელიასთან პოზიციას არ შევათანხმებ, მჭირდება დრო, მას შევხვდე და გავიარო კონსულტაცია, შევათანხმო.
მიზანმიმართული ქმედებაა, როგორც ჩანს, ასეთი მითითება აქვთ. ეს არის არაკოლეგიალური დამოკიდებულება და შეთანხმების დემონსტრაციულად დარღვევა”, – განაცხადა კონდახიშვილმა.
პროკურორ ამირან გულუაშვილის განცხადებით, პროცესის დაწყებამდე, რამდენიმე წუთით ადრე გახდა მათთვის ცნობილი, რომ მოწმეები სასამართლოში მოსვლას შეძლებდნენ.
ცნობისთვის, ნიკა მელიას აღკვეთის ღონისძიების სახით შეფარდებული პატიმრობა გირაოს სანაცვლოდ შეეცვალა. გირაოს თანხა – 40 000 ლარი ევროკავშირმა გადაიხადა. აღნიშნული თანხა „ევროპულმა ფონდმა დემოკრატიისთვის“ (European Endowment for Democracy) გამოყო და ხელისუფლებას საქართველოს ახალგაზრდა იურისტთა ასოციაციამ გადასცა.
