სასამართლოს გადაწყვეტილებით, “ნაციონალური მოძრაობის” თავმჯდომარის, ნიკა მელიას პატიმრობაში დატოვებას ოპოზიციის ერთ-ერთი ლიდერი, ირაკლი ოქრუაშვილი სოციალურ ქსელში გამოეხმაურა.
“13 აპრილი ხელისუფლების მიერ უგნურების გამოვლინების დღედ უნდა მივიჩნიოთ აწი.
არ გამკვირვებია ნიკას პატიმრობაში დატოვება. ერთი წლის წინ, ზუსტად ამ დღეს 5 წელი მომისაჯეს იგივე საქმეზე, იგივე მოწმეებით, იგივე პროკურორებით და იგივე დირიჟორით.
და რა მერე? ერთ თვეში თვითონვე გაგვათავისუფლეს, 20 ივნისის საქმეზე ყველა დაკავებული. ნიკასაც მალე გამოუშვებენ.”, – წერს ირაკლი ოქრუაშვილი.
„ერთიანი ნაციონალური მოძრაობის“ თავმჯდომარე კვლავ პატიმრობაში რჩება.
დღევანდელ სასამართლო პროცესზე ნიკა მელიას მიმართ შეფარდებული აღკვეთის ღონისძიება – პატიმრობა გადაისინჯა და ის ძალაში დარჩა.
გადაწყვეტილება თბილისის საქალაქო სასამართლოს მოსამართლე ნინო ჩახნაშვილმა რამდენიმე წუთის წინ გამოაცხადა.
სხდომას ესწრებოდა თავად ბრალდებული მელია, რომელმაც პროცესზე სიტყვით რამდენჯერმე ისარგებლა.
პროკურატურა დაკავებულისთვის აღკვეთის ღონისძიების სახით პატიმრობის გამოყენებას ითხოვდა და აღნიშნავდა, რომ ერთადერთი ღონისძიება, რომელმაც შეიძლება აღკვეთის ღონისძიების მიზნები უზრუნველყოს, არის პატიმრობა და ის ძალაში უნდა დარჩეს. პროკურორის განცხადებით, იმ შემთხვევაში, თუკი, დაცვის მხარე თანახმა იქნება, გირაოს შესახებ შეთავაზება შესრულდეს, პროკურატურა შუამდგომლობას დააყენებს.
დაცვის მხარე მელიას აღკვეთის ღონისძიების გარეშე დატოვებას ითხოვდა. ნიკა მელიასთვის პატიმრობის შეფარდების გადაწყვეტილება სასამართლომ 17 თებერვალს მიიღო.
